Narendra Modi: पंतप्रधान नरेंद्र मोदी यांनी गुरुवारी उत्तर प्रदेशातील मथुरा येथे श्रीकृष्ण जन्मभूमी मंदिरात भगवान राधाकृष्णाचे दर्शन घेतले. थोर कृष्णभक्त संत मीराबाई यांच्या ५२५व्या जयंतीनिमित्त आयोजित कार्यक्रमात सहभागी होण्यासाठी पंतप्रधान नरेंद्र मोदी हे मथुरेमध्ये आले होते.

यावेळी त्‍यांच्यासमवेत उत्तर प्रदेशाच्या राज्यपाल आनंदीबेन पटेल आणि उत्तर प्रदेशचे मुख्यमंत्री योगी आदित्यनाथ आणि मथुरेच्या खासदार अभिनेत्री हेमामालिनी यादेखील उपस्थित होत्या. यावेळी अनेक संतमहंत देखील उपस्थित होते. पंतप्रधान नरेंद्र मोदी हे मथुरेमध्ये येऊन राधाकृष्णाचे दर्शन घेणारे पहिले पंतप्रधान आहेत.

यावेळी बोलताना पंतप्रधान मोदी म्हणाले, ‘‘मथुरेतील कणाकणात भगवान राधाकृष्णाचा निवास आहे. त्यांचे दर्शन घेऊन आत्यंतिक आनंदाचा भाव मनात निर्माण झाला, मथुरा आणि व्रज भूमीच्या विकासात कोणताही हलगर्जीपणा होणार नाही.’’ ब्रज तीर्थ विकासाची स्थापना झाल्याबद्दल पंतप्रधान नरेंद्र मोदी यांनी समाधान व्यक्त केले.

संत मीराबाई यांच्या जयंती महोत्सवाच्या कार्यक्रमात सहभागी होण्याची संधी मिळणे ही माझ्यासाठी सौभाग्याची गोष्ट आहे, असेही मोदी म्हणाले.

या कार्यक्रमानिमित्त संत मीराबाई यांच्या स्मरणार्थ विशेष टपाल तिकिटाचे आणि विशेष नाण्याचे अनावरण करण्यात आले. त्याचप्रमाणे या कार्यक्रमात मीराबाई यांच्यावरील एक लघुपट देखील दाखविण्यात आला.

पंतप्रधान मोदी म्हणाले
- व्रज भूमीत भगवान राधाकृष्णाचे बोलावणे आल्या शिवाय कोणी येऊ शकत नाही
- भगवान श्रीकृष्ण आणि मीराबाई यांचा गुजरातशी घनिष्ठ संबंध
- व्रज क्षेत्रात होणारे बदल हे बदलत्या भारताचे प्रतीक