संपूर्ण देशात ओडिशाचे मुख्यमंत्री नवीन पटनायक यांचे नाव चर्चेत आहेत. मुख्यमंत्री हवा तर असा, अशी चर्चा देशात सुरू आहे. एकीकडे पुतळ्यांवरुन राजकारण करणारे नेते तर दुसरीकडे विकासासाठी स्वत:च्या वडीलांची समाधी पाडणारे नवीन पटनायक यांनी वेगळा संदर्भ निर्माण केला होता.

ओडिशाचे मुख्यमंत्री नवीन पटनायक यांनी पुरीच्या विकासासाठी २०१९ मध्ये त्यांचे वडील आणि ओडिशाचे माजी मुख्यमंत्री बिजू पटनायक यांची समाधी पाडण्याचे आदेश दिले होते. पुरी येथील स्वर्गदर येथील समाधी पाडण्याचा उद्देश स्मशानभूमीत अधिक जागा निर्माण करणे आणि तीर्थक्षेत्र शहरातील सुशोभीकरण मोहिमेला गती देणे हा होता.

खासगी सचिवांनी केला खुलासा

१३ वर्षांहून अधिक काळ मुख्यमंत्र्यांसोबत असलेले त्यांचे जवळचे स्वीय सचिव व्हीके पांडियन यांनी मंगळवारी दुबईत ओडिया समुदायाला संबोधित करताना हा खुलासा केला. ते म्हणाले, "आता स्मारकाऐवजी स्वर्गद्वारमध्ये बिजू बाबूंच्या नावाचा फक्त फलक आहे."

अनेक हिंदूंना स्वर्गद्वार येथे त्यांच्या प्रियजनांवर अंत्यसंस्कार करायचे असतात. कारण त्यांचा असा विश्वास आहे की तेथे अंत्यसंस्कार केल्यास मोक्ष प्राप्त होऊ शकतो. बिजू पटनायक यांच्या निधनानंतर त्यांचे स्मारक स्थानिक संस्थेने १७ एप्रिल १९९७ रोजी स्वर्गद्वार येथे बांधले होते. मात्र स्मशानभूमीच्या विकासाचा मुद्दा उपस्थित झाला होतो. पांडियन यांनी स्मशानभूमीच्या सुशोभिकरणाची योजना मुख्यमंत्र्यांना दाखविली होती. यावेळी मुख्यमंत्री नवीन पटनायक यांनी त्यांच्या वडिलांची समाधी पाडण्याचे आदेश दिले होते.

पांडियन म्हणाले, पटनायक म्हणाले होते, त्यांचे वडील 'लोगों के दिल में रहते हैं, पत्थर में नहीं'. पुरीचा स्वर्गद्वार हा राज्यातील पहिला परिवर्तन प्रकल्प होता. लोकांचा रोष टाळण्यासाठी मुख्यमंत्र्यांनी पहाटेच स्मारक पाडण्याचे आदेश दिल्याचे पांडियन यांनी सांगितले.