छत्तीसगड : देशातील सर्वाधिक नक्षलग्रस्त भागांपैकी एक असलेल्या छत्तीसगडमधील सुकमा (sukama) जिल्ह्यात शुक्रवारी संध्याकाळी झालेल्या चकमकीत एका कुख्यात नक्षलवादी कमांडरला ठार करण्यात सुरक्षा दलांना यश (crpf) आले आहे.

नक्षलवादी कमांडरचा खात्मा

छत्तीसगडमधील सुकमा जिल्ह्यात शुक्रवारी (ता.26) संध्याकाळी सुरक्षा दल आणि नक्षलवाद्यांमध्ये चकमक झाली. यादरम्यान सुरक्षा दलांनी नक्षलवादी कमांडरचा खात्मा केला. मारला गेलेला नक्षलवादी कमांडर बस्ता भीमा सुरक्षा दलांवर झालेल्या किमान नऊ प्राणघातक हल्ल्यांमध्ये सामील होता, असे पोलिसांनी सांगितले.

सुरक्षा दलांच्या संयुक्त कारवाईत झालेल्या चकमकीत माडवी भीमा, मिलिशिया कमांडर असे नक्षलवादी ठार झाले. त्यांच्याकडून 1 रायफल, 5 किलो वजनाचा 1 IED, 2 BGL शेल आणि 20 इलेक्ट्रिक डिटोनेटर्स जप्त करण्यात आल्याचे CRPF कडून सांगण्यात आले.

सीआरपीएफ आणि पोलिसांकडून राज्यात नक्षलवाद्यांविरोधात मोहीम राबवली जात आहे. यापूर्वीही अनेक नक्षलवाद्यांनी आत्मसमर्पण केले आहे. पोलीसांनी सांगितले की, गस्तीदरम्यान नक्षलवाद्यांनी सुरक्षा दलांवर गोळीबार सुरू केला. प्रत्युत्तरात सुरक्षा दलांनीही गोळीबार केला. चकमक संपल्यानंतर घटनास्थळावरून बस्ता भीमाचा मृतदेह सापडला. मार्च 2020 मध्ये मिनपा हल्ल्यात 17 जवान शहीद झाले होते त्यात भीमाचाही सहभाग होता. गेल्या वर्षी नोव्हेंबरमध्ये चिंतलनार येथे झालेल्या आयईडी स्फोटातही त्याचा सहभाग असल्याचे पोलिस अधीक्षकांनी सांगितले, ज्यामध्ये कोब्रा सहायक कमांडंट ठार झाला आणि नऊ जण गंभीर जखमी झाले.