नवी दिल्ली : क्रिप्टोकरन्सीच्या (crypto currency) जाहिरातींवर बंदी घालण्याबाबत कोणताही निर्णय घेण्यात आलेला नाही. तसेच "हे एक 'जोखमी' असलेले क्षेत्र असून ते पूर्ण नियामक चौकटीत नाहीये. त्यासाठी रिझर्व्ह बँक ऑफ इंडिया (RBI) आणि बाजार नियामक (SEBI) मार्फत जागरूकता निर्माण करण्यासाठी पावले उचलली जात आहेत, अशी माहिती केंद्रीय अर्थमंत्री निर्मला सीतारामण (Finance Minister Nirmala Sitharaman ) यांनी आज राज्यसभेत दिली. याशिवाय सरकार याबाबत लवकरच विधेयक आणणार असल्याचे त्या म्हणाल्या.

नवीन विधेयकावर (New Bill) काम केले जात असून ते लवकरच मंत्रिमंडळासमोर मांडले जाईल," असे त्यांनी राज्यसभेत प्रश्नोत्तराच्या तासात सांगितले. त्या म्हणाल्या की, गेल्या वेळी क्रिप्टोकरन्सीवर एक विधेयक प्रस्तावित करण्यात आले होते, परंतु आता आम्ही नवीन विधेयकावर काम सुरू केले असून मंत्रिमंडळाने मंजुरी दिल्यावर ते सभागृहात सादर केले जाईल असे त्या म्हणाल्या.

जाहिरातींवर अंकुश ठेवण्यासाठी उचललेल्या उपाययोजनाबद्दल विचारण्यात आलेल्या खासदार सुशील कुमार यांच्या प्रश्नाला उत्तर देताना सीतारमण म्हणाल्या की, "क्रिप्टोकरन्सीच्या जाहिरातींना आळा घालण्यासाठी अद्याप कोणतीही पावले उचलली गेलेली नाहीत, परंतु गुंतवणूकदारांना सावध केले गेले आहे.