नवी दिल्ली : झायडस कॅडिला कंपनीच्या ‘झायकोव्ह-डी’ या लसीचा लवकरच राष्ट्रीय लसीकरण कार्यक्रमात समावेश करण्यात येणार आहे. केंद्र सरकारने या लसीच्या एक कोटी मात्रांच्या खरेदी आदेश दिले आहेत. १२वर्षांपुढील सर्वांना ही लस देता येणार आहे. सुरुवातीला प्रौढांना ही लस देण्यात येणार आहे, नंतर मुलांना दिली जाईल, असे सूत्रांनी सांगितले.

‘झायकोव्ह-डी’ या लसीचा राष्ट्रीय लसीकरण कार्यक्रमात समावेशास केंद्रीय आरोग्य मंत्रालयाने मान्यता दिल्याचे समजते. यासाठी आवश्‍यक ती पूर्वतयारी करण्यासही मंत्रालयाने सांगितले आहे. ही लस ३५८ रुपयांना (करांव्यतरिक्त) उपलब्ध होणार आहे. या किमतीमध्ये ९३ रुपये किमतीच्या ‘जेट ॲप्लिकेटर’चाही समावेश आहे. या लसीचे तीन डोस घ्यावे लागणार आहेत. प्रत्येक डोस २८ दिवसांच्या मुदतीने घ्यायचा आहे. ही डीएनए आधारित व सुई विरहित लस आहे.

‘झायकोव्ह-डी’ या लसीला २० ऑगस्ट रोजी औषध नियंत्रकांनी आपत्कालीन वापरासाठी परवानगी दिली होती. या लसीचा समावेश राष्ट्रीय लसीकरण कार्यक्रमात करण्यात येणार असल्याचे नीती आयोगाचे सदस्य डॉ. व्ही. के. पॉल यांनी ३० सप्टेंबर रोजी सांगितले होते. दर महिन्याला एक कोटी लसींचे डोस देण्याची क्षमता झायडस कॅडिला कंपनीची आहे.

आणखी एक लस

भारत बायोटेकनेही दोन ते १८ या वयोगटातील मुलांसाठी लस तयार केली असून भारताचे औषध नियंत्रकांमार्फत त्याची तपासणी सुरू आहे. ती लसही लवकरच उपलब्ध होण्याची शक्यता आहे. या लसीच्या वापराला काही अटींवर परवानगी देण्याची शिफारस तज्ज्ञ समितीने १२ ऑक्टोबर रोजी केली होती.