Tricolour Hoisting at New Parliament

नवी दिल्ली- नवीन संसद भवनावर ध्वजारोहण करण्यात आले आहे. उपराष्ट्रपती जयदीप धनखड यांच्या हस्ते नव्या संसद भवनावर ध्वजारोहण करण्यात आला. यावेळी लोकसभेचे अध्यक्ष ओम प्रकाश बिर्ला हेही उपस्थित होते. पंतप्रधान मोदींचा आज वाढदिवस आहे. शिवाय उद्यापासून संसदेचे विशेष अधिवेशन सुरु होत आहे.

संसदेचे विशेष अधिवेशन सुरू होण्याच्या एक दिवस अगोदर विश्वकर्मा पूजेच्या निमित्ताने नवीन संसद भवनावर तिरंगा फडकवण्यात आला. सोमवारपासून संसदेचे विशेष अधिवेशन बोलवण्यात आले आहे. पहिल्या दिवसाचे अधिवेशन संसदेच्या जुन्या इमातीतून होईल. त्यानंतर उरलेल्या चार दिवसांचे अधिवेशन संसदेच्या नवीन इमारतून होईल, असं सांगण्यात आलंय. त्यापूर्वी औपचारिकरीत्या नव्या संसदेवर ध्वजारोहण करण्यात आले.

उपराष्ट्रपती धनखड यांच्या हस्ते ध्वजारोहण झाले. यावेळी लोकसभा अध्यक्ष ओम प्रकाश बिर्ला, संसदीय कामकाज मंत्री प्रल्हाद जोशी, राज्यसभेचे उपसभापती हरिवंश, संसदीय कामकाज राज्यमंत्री अर्जुन राम मेघवाल आणि व्ही मुरलीधरण, यांच्यासह दोन्ही सभागृहातील पक्षांचे नेते कार्यक्रमासाठी उपस्थित होते.

ध्वजारोहण कार्यक्रमावेळी काँग्रेसचे अध्यक्ष मल्लिकार्जुन खरगे हे गैरहजर असल्याचं पाहायला मिळालं. काँग्रेस वर्किंग कमिटीच्या बैठकीत व्यस्त असल्याने ते येऊ शकले नाहीत, असं कारण सांगण्यात आलं. त्यानंतर निमंत्रण उशीरा मिळाल्याने त्यांनी येण्याचं टाळल्याचं सांगितलं गेले. ध्वजारोहणावेळी काँग्रेसचे संसदीय गटाचे नेते अधीर रंजन चौधरी हे उपस्थित होते.

नवा ड्रेस कोड

नव्या संसद भवनात शिफ्ट होण्यासाठी सरकारने तयारी सुरु केली आहे. ध्वजारोहण झाल्याने आता अधिकृतरीत्या नव्या संसद भवनात शिफ्ट होता येणार आहे. विशेष म्हणजे संसदेच्या दोन्ही सभागृहात नवा ड्रेस कोड लागू करण्यात आलाय. त्यामुळे संसदेतील कर्मचाऱ्यांना नवा गणवेश परिधान करावा लागणार आहे. या नव्या ड्रेस कोडवरुन काँग्रेसने टीकाही केली होती. (Latest Marathi News)