धुमधडाक्यात लग्न झाले. नववधू सासरी गेली. पण, लग्नाचा आनंद जास्त काळ टीकू शकला नाही. अवघ्या १५ दिवसांत संसाराचा शेवट झाला. नदीच्या पाण्यात पडून पतीचा मृत्यू झाला, तर पत्नी अत्यावस्थ आहे. केरळमधील कोझिकोड (Kozhikode Kerala) येथील कुट्टियाडीपुझ्यात ही हृदयद्रावक घटना घडली आहे. (Groom Died During Photoshoot Kerala)

रेजिल, असं मृत तरुणाचं नाव आहे. त्याचं नुकतंच १४ मार्चला लग्न झाले होते. नव्या संसाराला सुरुवात होऊन १५ दिवस झाले. त्यानंतर त्यांनी फोटोशूटसाठी जायचं ठरवलं. ते दोघेही कुट्टियाडी येथील जानकीकाडुपुझा येथील नदीच्या किनाऱ्यावर फोटोशूट करण्यासाठी गेले. फोटोशूट करताना रेजिलचा पाय दगडावरून घसरला. त्याच्यासोबत नववधू देखील पाण्यात पडली. जानकीपुझा या नदीमध्ये यापूर्वी अनेकांचे अपघात झाले आहेत. रेजिल येथील रहिवासी असल्यानं त्याला या गोष्टींची माहिती होती. तरीही ते दोघं फोटोशूटसाठी या नदीवर गेले होते.

स्थानिकांनी नदीत उडी घेत दोघांनाही वाचविण्याचा प्रयत्न केला. दोघांनाही पाण्याबाहेर काढल्यानंतर रुग्णालयात दाखल केले. पण, डॉक्टरांनी रेजिलला मृत घोषित केले. त्याची पत्नी सध्या अत्यावस्थ असून तिच्यावर रुग्णालयात उपचार सुरू आहेत. पंधरा दिवसांपूर्वी ज्या घरातून लग्नाची वरात निघाली होती, आज त्याच मुलाची अंत्ययात्रा निघाल्याने आई-वडिलांनी हंबरडा फोडला. तसेच तरुण मुलगा गमावल्याने गावात देखील हळहळ व्यक्त केली जात आहे.