नवी दिल्ली ः केंद्रीय अर्थमंत्री निर्मला सीतारामन यांनी आपला पहिला केंद्रीय अर्थसंकल्प सादर करण्यापूर्वी माजी पंतप्रधान डॉ. मनमोहनसिंग यांची भेट घेतली. या भेटीचा तपशील जाहीर करण्यात आला नसला, तरी यात अर्थसंकल्पावर चर्चा झाल्याचे मानले जाते. यामुळे सोशल मिडीयावर मात्र वेगवेगळ्या चर्चांना उधाण आले आहे

भाजप आघाडीचे सरकार पुन्हा सत्तेत आल्यानंतरचा पहिला अर्थसंकल्प पाच जुलैला मांडला जाणार आहे. या अर्थसंकल्पाकडून कृषी, उद्योग यांसह वेगवेगळ्या क्षेत्रांच्या असलेल्या अपेक्षा अर्थमंत्री जाणून घेत आहेत. गेल्याच आठवड्यात झालेल्या बैठकीदरम्यान राज्यांकडूनही अभिप्राय जाणून घेऊन केंद्र पुरस्कृत योजनांची अंमलबजावणी, राज्यांना मिळणारा निधी यांसारख्या बाबींवर त्यांनी विचारविनिमय केला होता.

निती आयोगाने बोलावेल्या अर्थतज्ज्ञांच्या बैठकीदरम्यान पंतप्रधान नरेंद्र मोदी यांनीही आर्थिक सूचना जाणून घेतल्या होत्या. त्या पार्श्‍वभूमीवर निर्मला सीतारामन यांनी आर्थिक उदारीकरण धोरणाचे शिल्पकार असलेले डॉ. मनमोहनसिंग यांची घेतलेली भेट महत्त्वाची मानली जात आहे.