नवी दिल्ली : लखीमपूर खेरी प्रकरणी आरोपांच्या फैरीत सापडलेले, पत्रकारांना शिवीगाळ-धक्काबुक्की करणारे केंद्रीय गृह राज्यमंत्री अजय मिश्रा टेनी यांच्याबाबतीत सध्याचा गदारोळ थोडा थांबला की मिश्रा यांनी स्वतःहूनच राजीनामा द्यावा, असा मध्यम मार्ग चोखाळावा, या विचाराप्रत भाजपचे सर्वेसर्वा नेतृत्व आल्याची निश्चित माहिती ‘सकाळ’ला मिळाली आहे.

मंत्री मिश्रा यांच्यावर कारवाई तातडीने होण्याची शक्यता भाजप नेते अजूनही फेटाळतात. मात्र मिश्रा यांनी पत्रकारांना शिवीगाळ केल्याने गृहमंत्री अमित शहा यांनी त्यांना काल (ता. १५) चांगलेच फटकारले. तरीही, विरोधकांचा संसदेतील गदारोळ सुरू असेपर्यंत मिश्रांवर कुऱ्हाड कोसळण्याची शक्यता नाही, असेही पक्षनेते सांगतात.

काही वर्षांपूर्वी माजी खासदार कार्ती चिदंबरम यांच्यावर आरोप होताच त्यांचे वडील आणि तत्कालीन गृहमंत्री पी. चिदंबरम यांच्यावर राज्यसभेत कडकडीत बहिष्कार घालणाऱ्या भाजपने मिश्रा यांच्या मुद्यावर मात्र - ‘मुलाच्या गुन्ह्याची शिक्षा पित्याला का द्यायची,’ अशी कोलांटउडी मारली आहे. नितीन गडकरी यांच्या अध्यक्षपदाच्या काळात गुन्हेगारी इतिहास असलेल्या बाबूसिंह कुशवाहा यांना भाजपने वाजत गाजत पक्षात घेतल्यावर गदारोळ झाला होता आणि संघाने मध्यस्थी करून कुशवाहा यांना स्वतःलाच राजीनामा देण्यास सांगितले होते, असे पक्षनेते सांगतात.

मागच्या दाराने मंत्रालयात !

अजय मिश्रा आज गृह मंत्रालयात मागील दरवाजाने आले आणि मागील दरवाजानेच बाहेर पडले. तेथेही पत्रकारांना पाहताच थेट दरवाजातच त्यांची गाडी लावण्यात आली व तीत बसून, खाली मान घालून, मोबाईल पाहण्याचे निमित्त करून मिश्रा निघून गेले. त्यांच्याकडील महत्त्वाच्या फायली आधीच काढून घेण्यात आलेल्या असून चार दिवस त्यांना ईशान्य भारताच्या दौऱ्यावर जाण्यास सांगण्यात आले आहे. सोमवारी (ता. २०) सशस्त्र सीमा बलाच्या वर्धापनदिन सोहळ्याला मिश्रा हे प्रमुख पाहुणे आहेत. मात्र, त्या कार्यक्रमालाही न जाण्यास त्यांना सांगितले जाण्याची शक्यता आहे.

मंत्री अजय मिश्रा यांच्या मुलाला दोषी ठरविणारा अहवाल देणारी एसआयटी योगी सरकारनेच बनविली ना? न्यायालयाच्या आदेशानंतर मिश्रा प्रकरणी कायदा आपले काम करत असताना, ‘मंत्री मारेकरी आहे’ असे सांगणारे स्वतःला कायद्याच्या वर मानतात. अध्यादेश फाडण्याचा त्यांचाच इतिहास आहे.

- मुख्तार अब्बास नक्वी, भाजप नेते