नवी दिल्ली : यंदाच्या प्रजासत्ताक दिनी राजपथावर प्रवेश मिळवायचा असेल, तर कोविड-१९ लसीकरणाचे दोन्ही टप्प्यांचे लसीकरण होणे अत्यावश्यक आहे. दिल्ली पोलिसांनी आज जारी केलेल्या सुधारित दिशानिर्देशांनुसार दोन्ही टप्प्यांचे लसीकरणाचे प्रमाणपत्र नसेल तर २६ जानेवारीला राजपथावर प्रवेशच मिळणार नाही. व्हीव्हीआयपींपासून सामान्य नागरिकांसाठीही लसीकरण प्रमाणपत्र जवळ बाळगण्याचा आग्रह करण्यात आला आहे.

कोरोनाच्या तिसऱ्या लाटेचा कहर सुरू असल्याने यंदाच्या संचलनात १५ वर्षांच्या आतील मुलांना प्रवेश देण्यात येणार नसल्याचेही पोलिसांनी स्पष्ट केले आहे. संपूर्ण संचलनादरम्यान मास्क लावणे व सामाजिक अंतरभानाचे काटेकोर पालन करणेही सक्तीचे करण्यात आले आहे. यंदाच्या प्रजासत्ताक दिनाच्या संचलनात ७५ लढाऊ विमानांच्या हवाई कसरतींसह अनेक वैशिष्ट्यांचा समावेश आहे. नेहमीच्या वेळेपेक्षा अर्धा तास उशिरा म्हणजे सकाळी साडेदहापासून संचलनास सुरवात होईल. यासाठी हजारो नागरिकांनी पास घेतले आहेत आणि या सर्वांना लसीकरण प्रमाणपत्र दाखविणे बंधनकारक असेल.

प्रजासत्ताक दिन संचलनासाठी दिल्ली पोलिसांनी यंदा विशेष सुरक्षा उपाययोजना केल्याची माहिती पोलिस आयुक्त राकेश अस्थाना यांनी सांगितले. यासाठी राजपथच नव्हे तर ल्यूटियन्स दिल्लीच्या व दिल्लीकडे येणाऱ्या सीमांवरही प्रचंड पोलिस बंदोबस्त तैनात करण्यात येणार आहे. २५ जानेवारीच्या दुपारपासून सरकारी कार्यालये रिकामी करण्यात येतील. राजपथासह दिल्लीच्या सुरक्षेची मुख्य जबाबदारी दिल्लीतील ७१ पोलिस उपायुक्त (डीसीपी), २१३ सहायक पोलिस आयुक्त (एसीपी) व ७५३ पोलिस निरीक्षक, उप निरीक्षक यांच्यावर असेल. त्यांच्या जोडीला फक्त राजपथाच्या आसपास २७ हजार ७२३ पोलिस व केंद्रीय सशस्त्र दलांचे हजारो जवानही हजारो तैनात असतील. स्फोटके व बॉम्ब निकामी करणारी पथकेही ठिकठिकाणी तैनात केली जात आहेत.

दोन महिन्यांपासून सुरक्षेची तयारी

मागील दोन महिन्यांपासून प्रजासत्ताक दिन संचलनाच्या सुरक्षेची तयारी दिल्ली पोलिस दलातर्फे सुरू आहे. केंद्राने १५ ते १८ वयोगटातील मुलांच्या कोरोना लसीकरणाला सुरवात केली होती. त्या पार्श्वभूमीवर यंदाच्या संचलनात १५ वर्षांच्या आतील मुलांना प्रवेश मिळणार नाही. संचलन पाहण्यास येणाऱ्या नागरिकांसाठी राजपथाकडे येणारी सारी प्रवेशद्वारे सकाळी सातला उघडण्यात येतील. मोटारचालकांना त्यांच्या मोटारीच्या चाव्या वाहनतळावर जमा कराव्या लागतील, असेही या दिशानिर्देशांत म्हटले आहे.