नवी दिल्ली : स्वतंत्र विदर्भ राज्याची मागणी वारंवार केली जाते. मागील काही दशकांपासून ही मागणी सातत्याने सुरू आहे. या वेगळ्या राज्यासाठी अनेकदा आंदोलनेही झाली आहेत. हे वेगळं राज्य होणार का? यासंदर्भातच आता केंद्र सरकारने लोकसभेत महत्त्वाची माहिती दिली आहे. केंद्रीय गृह राज्यमंत्री नित्यानंद राय यांनी लोकसभेत ही माहिती दिली. महाराष्ट्र सोडून वेगळ्या विदर्भ राज्याच्या निर्मितीसाठी सरकारने काही पाऊल उचलले आहे का किंवा असे राज्य करण्याचा काही प्रस्ताव आहे का, असा प्रश्न विचारण्यात आला होता.

यावर उत्तर देताना केंद्र सरकारने म्हटलंय की, स्वतंत्र विदर्भासंदर्भातील कोणताही प्रस्ताव सरकारकडे विचाराधीन नाही, असं स्पष्टीकरण लोकसभेमध्ये सरकारकडून देण्यात आलं आहे. स्वतंत्र विदर्भाबाबत भाजप खासदार अशोक नेते यांनी लोकसभेत प्रश्न विचारला होता. त्यावर आता केंद्रीय गृहमंत्रालयाचं उत्तर दिलंय. तूर्तास कुठलाही प्रस्ताव विचाराधीन नाही, असं स्पष्टीकरण त्यांनी दिलं आहे.