इटावा : कोरोनाच्या दुसऱ्या लाटेने देशभरात थैमान घातले असून आता कोरोनाची तिसरी लाट येणार असे संकेत तज्ज्ञांनी दिले आहेत. यामुळे केंद्र आणि राज्य सरकारांनी लसीकरण (Corona Vaccination) मोहिमेकडे मोर्चा वळवला आहे. कोरोनाला रोखण्यासाठी काही ठिकाणी लॉकडाउन लागू करण्यात आला आहे, तर काही ठिकाणी निर्बंध घालण्यात आलेले आहेत. उत्तर प्रदेशमधील रुग्णसंख्याही वाढत आहे. या पार्श्वभूमीवर उपविभागीय दंडाधिकाऱ्यांनी (SDM) दारु विक्रेत्यांना दिलेल्या सूचनांमुळे उत्तर प्रदेश पुन्हा चर्चेत आलं आहे. (No vaccine no alcohol in UP's Etawah District)

उत्तर प्रदेशच्या इटावामधील सैफई गावातील प्रत्येक दारुच्या दुकानात एक नोटीस लावण्यात आली आहे. ज्यांनी कोरोना प्रतिबंधक लस घेतलेली आहे, त्यांनाच दारुची विक्री करण्यात येणार आहे. दारुची विक्री करणाऱ्या दुकानदारांना लसीकरण प्रमाणपत्र दाखविल्यानंतरच दारुची विक्री करण्याच्या सूचना देण्यात आल्या आहेत. इटावाचे अतिरिक्त जिल्हाधिकारी हेम कुमार सिंह यांनी याबाबतचे निर्देश दिले आहेत.

अशा प्रकारचा कोणताही आदेश काढण्यात आलेला नाही. उपविभागीय दंडाधिकाऱ्यांनी दारु विक्रेत्यांना नागरिकांना लसीकरण करण्यासाठी प्रोत्साहित करण्यास सांगितले आहे, अशी माहिती इटावा जिल्हा उत्पादन शुल्क अधिकारी कमल कुमार शुक्ला यांनी दिली. याआधी फिरोजाबादमधील दारुच्या दुकानामध्ये अशा प्रकारची नोटीस लावल्याचे दिसून आले होते. तसेच सरकारी कर्मचाऱ्यांनी तीन दिवसात लसीकरण प्रमाणपत्र जमा न केल्यास त्यांना मे महिन्याचे वेतन देण्यात येणार नाही, असे फर्मान तेथील जिल्हाधिकाऱ्यांनी काढले होते.

दरम्यान, अलीगढमध्ये विषारी दारुमुळे २५ जणांना आपला जीव गमवावा लागला होता. त्या घटनेनंतर प्रशासन खडबडून जागे झाले आहे. इटावामधील सर्व दारु दुकानांची तपासणी सुरू झाली. पोलिस आणि स्वत: अतिरिक्त जिल्हाधिकारी हेम कुमार सिंह देशी आणि विदेशी दारुची विक्री करणाऱ्या दुकानांची तपासणी करण्यासाठी पोहोचले. ग्राहकांकडे लसीकरण प्रमाणपत्र असेल, तरच दारुची विक्री केली जाईल. त्यामुळे आधी लसीकरण करा आणि मगच दारु विकत घेण्यास या, अशा सूचना विक्रेते देत आहेत.

देशभरातील आणखी बातम्या वाचण्यासाठी येथे क्लिक करा.