भुवनेश्वर - ओडिसात आमदाराने गर्दीत कार घुसवल्यानं २२ जण जखमी झाले आहेत. यामध्ये सात पोलिस कर्मचाऱ्यांचा समावेश आहे. बीजेडीचे चिलिका मतदारसंघातील आमदार प्रशांत जगदेव यांच्या गाडीने लोकांना चिरडल्याची घटना घडल्याचं पोलिसांनी म्हटलं आहे.

याबाबत मिळालेल्या माहितीनुसार, भाजप समर्थकांसह मोठ्या प्रमाणावर नागरिक बनापूर ब्लॉक डेव्हलपमेंट ऑफिसच्या समोर जमा झाले होते. विभागीय अध्यक्ष निवडणुकीच्या निमित्ताने ते एकत्र आले असताना ही घटना घडली असल्याची प्राथमिक माहिती मिळत आहे.

घटनेनंतर जगदेव यांच्यावर काही लोकांनी हल्ला केल्यानंतर तेसुद्धा जखमी झाले आहेत. त्यांच्यावर उपचार सुरु आहेत. तसंच या घटनेत कोणीही मृत्यूमुखी पडले नसून घटनेची चौकशी केली जात असल्याचं खुर्दा पोलिस अधीक्षक एसपी अलेख चंद्र पाधी यांनी सांगितलं आहे.