नवी दिल्ली - 19 सप्टेंबर 2023 चा गणेश चतुर्थीचा दिवस भारताच्या इतिहासात अजरामर झाला आहे. आज पंतप्रधान नरेंद्र मोदी यांनी जुन्या संसदेत शेवटचे भाषण केले आणि त्यानंतर संविधानासह नवीन संसद भवनात प्रवेश केला. जुन्या संसद भवनात पंतप्रधान नरेंद्र मोदींच्या भाषणादरम्यान संसद टीव्हीवर अनेक क्षणचित्रे दाखवण्यात आली होती. परंतु सोनिया गांधी आणि ज्योतिरादित्य शिंदे यांच्या फोटोने सर्वांचे लक्ष वेधून घेतले.

जुन्या संसदेत शेवटच्या दिवशी काँग्रेसच्या माजी अध्यक्षा सोनिया गांधी आणि मोदी सरकारमधील केंद्रीय मंत्री ज्योतिरादित्य सिंधिया सेंट्रल हॉलमध्ये एका जागेवर बसलेले दिसले. संसद टीव्हीचा कॅमेरा जेव्हा-जेव्हा ज्योतिरादित्य आणि सोनिया गांधींकडे गेला तेव्हा दोन्ही नेते भाषण ऐकताना दिसले. तथापि, पीटीआय या वृत्तसंस्थेने संध्याकाळी प्रसिद्ध केलेल्या छायाचित्रांमध्ये ज्योतिरादित्य सिंधिया सोनिया गांधींना शुभेच्छा देताना दिसले.

ज्योतिरादित्य दीर्घकाळ काँग्रेसमध्ये होते, पण 2020 मध्ये त्यांनी त्यांच्या समर्थकांसह बंड केले आणि मध्य प्रदेशातील कमलनाथ यांचे सरकार पाडले. यानंतर ते भाजपमध्ये दाखल झाले. ज्योतिरादित्य सिंधिया सध्या नरेंद्र मोदी सरकारमध्ये नागरी विमान वाहतूक मंत्रालय सांभाळत आहेत. ज्योतिरादित्य सिंधिया यांनी काँग्रेस पक्षाविरुद्ध बंड केले तेव्हा राहुल गांधी म्हणाले होते की, “काँग्रेसमधील ते एकमेव नेते होते, जे कधीही माझ्या घरात येऊ शकतात. कॉलेजमध्ये ते माझ्यासोबत होते.