पाटणा : राष्ट्रपती निवडणुकीसाठी विरोधी पक्षांकडून एक उमेदवार उभा केला जाईल, अशी माहिती भारताय कम्युनिस्ट पक्षाचे सरचिटणीस डी. राजा यांनी दिली.‘भाकप’च्या दोन दिवसांच्या बिहार राज्य परिषदेची सांगता मंगळवारी (ता.१९) झाली. त्यानंतर डी. राजा म्हणाले, ‘‘राज्यांमधील निवडणुका विरोधी पक्षांनी स्वतंत्रपणे लढल्या असल्या तरी राज्यघटना व लोकशाहीच्या बचावासाठी सर्व विरोधी पक्ष एकत्र येत राष्ट्रपती निवडणूक एकजुटीने लढवेल. याची सुरुवात झाली आहे.

’’ काही दिवसांपूर्वीत विरोधी पक्षांच्या नेत्यांची भेट झाली होती. त्यात राजद नेते तेजस्वी यादव यांचाही समावेश होता. ‘राष्ट्रपती निवडणुकीतील विरोधी पक्षांच्या एकीसाठी भाकप पुढाकार घेईल, असे डी. राजा म्हणाले. ‘‘राष्ट्रपती निवडणुकीत विरोधकांची ताकद पाहायला मिळेल. या निवडणुकीसाठी देशभरातील सर्व डावे पक्ष आणि विरोधक ताकदीने एकत्र आले आहेत,’’ असे राष्ट्रीय चिटणीस अतुल कुमार अनजान यांनी सांगितले.

सप्टेंबर राज्य संमेलन

दोन दिवसांच्य राज्य परिषदेत पक्षाने संघटनेची मजबूतीस आंदोलन अशा वेगवेगळ्या मुद्यांवर विस्ताराने चर्चा केली. बिहारमधील बांका जिल्ह्यात राज्य संमेलन यंदा १८ ते २१ सप्टेंबरमध्ये आयोजित करण्याचा निर्णयही यावेळी झाला.