नवी दिल्ली : आपण सर्वांनीच कोरोना विषयक नियम आणि वर्तणुकीचे पालन केले, तसेच अधिकाधिक लोकांचे लसीकरण झाले तर तिसरी लाट टाळता येऊ शकेल, असं नीती आयोगाचे सदस्य (आरोग्य) डॉ. व्ही. के. पॉल यांनी सांगितले. असे अनेक देश आहेत, जिथे कोरोनाची दुसरी लाटही आली नाही. आपण नियमांचे पालन केले तर हा काळही निघून जाईल. अर्थव्यवस्था पुन्हा सुरु करत सगळे व्यवहार पूर्ववत करण्यासाठी जलद लसीकरण आवश्यक आहे, असेही पॉल म्हणाले.

लस असुरक्षित आहे, असे समजणे ही सर्वात मोठी चूक आहे. आरोग्य कर्मचाऱ्यांना आधी लस देऊन सुरक्षित करण्याच्या निर्णयामुळे दुसऱ्या लाटेत त्यांना सुरक्षित ठेवू शकलो. खूप कमी आरोग्य कर्मचाऱ्यांना या काळात संसर्ग झाला. अन्यथा आरोग्य यंत्रणा आणि रुग्णालये दुसऱ्या लाटेत कोलमडली असती. त्यामुळे, याची खात्री बाळगा, की लसींमुळे लोकांचा संसर्गापासून बचाव होतो आहे, असे पॉल यांनी सांगितलं.

बाजारांतील गर्दी तिसऱ्या लाटेला आमंत्रण देणारी -

दुसऱ्या लाटेला कारणीभूत ठरलेला विषाणूचा डेल्टा व्हॅरियंट नष्ट झालेला नाही. त्यात बदल होण्याची शक्यता देखील वर्तविली जात आहे. लॅम्बडा नावाचा विषाणूचा नवा प्रकार परदेशात सापडला आहे. विषाणूतील बदल हा देखील तिसऱ्या लाटेला कारणीभूत ठरू शकेल, असे तज्ज्ञांचे मत आहे. अखिल भारतीय आयुर्विज्ञान संस्थेचे संचालक डॉ. रणदीप गुलेरिया यांनी बाजारांतील गर्दी तिसऱ्या लाटेला आमंत्रण देणारी ठरेल, असे मत मांडले आहे.

संसर्गाचा दर पाच टक्यांखाली

देशात कोरोनाचा दैनंदिन संसर्गाचा सरासरी दर पाच टक्क्यांपेक्षा खाली आहे. दुसऱ्या लाटेमुळे ठप्प झालेले जनजीवन पूर्ववत करण्यासाठी हे दिलासादायक चित्र असले, तरी विषाणूचे बदलत असलेले रुप हे तिसऱ्या लाटेचा धोका कायम ठेऊन आहे.