नवी दिल्लीः संसदेमध्ये घुसखोरी करणारे चार जण आणि इतर दोन जणांची ओळख पटलेली असून ज्याने इतरांना घुसखोरी करण्यास मदत केली त्यालाही पोलिसांनी ताब्यात घेतले आहे. महत्त्वाचं म्हणजे या तरुणांनी संसदेमध्ये घुसखोरी का केली? त्याचं कारण स्पष्ट झालं आहे.

पोलिसांनी पकडलेल्या आरोपींची चौकशी केल्यानंतर त्यांच्या घुसखोरीचं कारण समोर आलेलं आहे. सर्व हल्लेखोर बेरोजगार आहेत आणि नोकरी न मिळाल्याने ते त्रस्त होते, अशी प्राथमिक माहिती समोर आलेली आहे. 'लाईव्ह हिंदुस्थान'ने हे वृत्त दिले आहे.

पोलिसांनी ताब्यात घेतलेले सहाही आरोपी वेगवेगळ्या जिल्ह्यातील आहेत. ते एकमेकांना ओळखत असल्याचं स्पष्ट झालेलं आहे. बुधवारी त्यांनी संसदेमध्ये जे काही केलं, त्याबद्दल त्यांच्या कुटुंबियांना काहीही माहिती नव्हती. ताब्यात घेण्यात आलेल्यांमध्ये नीलम, अमोल, मनोरंजन, विशाल, ललित झा यांचा समावेश आहे.

प्राथमिक चौकशीमध्ये अनमोलने पोलिसांना सांगितलं की, शेतकऱ्यांचे प्रश्न, मणिपूर संकट आणि बेरोजगारीने तरुण त्रस्त आहेत. दिल्ली पोलिसांच्या विशेष पथकाने या प्रकरणी कलम १२० आणि ४५२ नुसार गुन्हा नोंद केला आहे.

दरम्यान, या प्रकरणी आज गुरुवारी केंद्रीय गृहमंत्री अमित शाह संसदेच्या दोन्ही सभागृहामध्ये निवदेन करणार आहेत. हे चौघे तरुण नेमक्या कोणत्या कारणाने संसदेत घुसले होते, त्यांच्या मागण्या काय आहेत आणि ते कुठल्या संघटनेशी संबंधित आहेत का? याबाबत सभागृहात खुलासा होणार आहे. याकडे सर्वांचं लक्ष लागून राहिलं आहे. उच्चशिक्षित तरुण थेट संसदेत का घुसले? याचं अधिकृत कारण स्पष्ट झालेलं आहे.