नवी दिल्ली - देशात विमानाने प्रवास करणाऱ्यांच्या संख्येत वाढ झाल्याची माहिती केंद्रीय नागरी विमान वाहतूक मंत्री ज्योतिरादित्य शिंदे यांनी गुरुवारी दिली. देशात २०१४ मध्ये सहा कोटी नागरिक विमानाने प्रवास करत होते; आता ही संख्या सुमारे १४ कोटींवर पोहोचली असल्याचेही ते म्हणाले. तसेच, देशात विमानाचे तिकीट हे रेल्वेच्या पहिल्या श्रेणीच्या वातानुकूलित डब्याच्या तिकिटाएवढे असल्याचेही त्यांनी सांगितले.

लोकसभेमध्ये प्रश्नोत्तराच्या तासात विमानाच्या तिकिटांच्या वाढत्या दराबाबत प्रश्न विचारण्यात आला होता. त्यावेळी शिंदे यांनी ही माहिती दिली. देशातील नागरी विमान वाहतूक हे नियंत्रणमुक्त क्षेत्र आहे; परंतु, मध्यंतरीचा कोरोनाकाळ आणि इंधनाच्या वाढत्या किमती हे लक्षात घेऊनही विमानाच्या तिकिटाच्या दरात त्या प्रमाणात वाढ करण्यात आलेली नसल्याचेही मंत्री शिंदे यांनी स्पष्ट केले.

२०३० पर्यंत देशात ४२ कोटी विमानप्रवासी असतील तसेच या क्षेत्राची वाढ तिपटीने झाली असेल, असा आशावादही शिंदे यांनी या वेळी व्यक्त केला.