Independence Day 2024 Marathi News : डॉक्टर होण्याचं स्वप्न घेऊन वैद्यकीय शिक्षणासाठी भारतातील मुलांना विदेशात शिक्षणासाठी जावं लागतं आहे. यासाठी त्यांना कुठल्याही देशांमध्ये जाऊन शिक्षण घ्यावं लागत आहे. यासाठी त्यांचा मोठ्या प्रमाणावर पैसा खर्च होत आहे. त्यामुळं आता येत्या पाच वर्षात ७५,००० जागा वाढवण्यात येतील, असं सरकारनं निश्चित केल्याचं पंतप्रधान नरेंद्र मोदी यांनी स्वातंत्र्यदिनानिमित्त लाल किल्ल्यावरुन भाषण करताना जाहीर केलं.

पंतप्रधान म्हणाले, "वैद्यकीय शिक्षणासाठी आमची मुलं देशाबाहेर जात आहेत. यामध्ये जास्त करुन मध्यवर्गीय कुटुंबातील मुलं आहेत, यासाठी त्यांचे लाखो करोडो रुपये खर्च होतात. सुमारे २५,००० तरुण प्रत्येक वर्षी मेडिकलच्या शिक्षणासाठी परदेशात जावं लागतं. कधी कधी अशा देशात जावं लागतं की मी विचार केला तर हैराण व्हायला होतं. त्यामुळं गेल्या १० वर्षात आम्ही मेडिकलच्या जागा वाढवून त्या १ लाख केल्या. त्यामुळं आम्ही हे निश्चित केलं आहे की येत्या पाच वर्षात मेडिकल क्षेत्रात ७५,००० नव्या जागा तयार केल्या जातील"

विकसित भारत २०४७ मध्ये 'स्वस्थ भारत'ही व्हायला हवा. या स्वस्थ भारतासाठी आजच्या मुलांच्या पोषणावर आजपासूनच लक्ष देणं गरजेचं आहे. त्यामुळं विकसित भारताची जी पहिली पिढी आहे, त्यांच्याकडं विशेष लक्ष देऊन पोषणचं एक अभियान सरकारनं चालवलं आहे. यासाठी आम्ही 'राष्ट्रीय पोषण मिशन' सुरु केलं आहे, असंही मोदींनी यावेळी सांगितलं.