PM Modi’s First Visit to China Since Galwan Clash: भारत आणि चीनमध्ये गलवान खोऱ्यात संघर्ष उफाळल्यानंतर आता पंतप्रधान मोदी पहिल्यांदाच चीन दौऱ्यावर जाणार आहेत. या महिन्याच्या अखेरीस मोदींचा हा परदेश दौरा असणार असल्याची माहिती समोर आली आहे. पंतप्रधान मोदी आपल्या या परदेश दौऱ्यात जपान आणि चीन या देशांना भेट देतील. यामध्ये जपानचा त्यांचा दौरा द्विपक्षीय आहे, तर चीनचा दौरा एससीओ बैठकीत सहभागी होण्याची असणार आहे, अशी अपडेट समोर आली आहे.

प्राप्त माहितीनुसार पंतप्रधान मोदी ३० ऑगस्ट रोजी जपानला पोहचणार आहेत. या ठिकाणी ते जपानचे पंतप्रधान फुमियो किशिदा यांच्यासोबत भारत-जपान वार्षिक शिखर परिषदेत सहभागी होणार आहेत. या बैठकीत भारत आणि जपानमधील धोरणात्मक, आर्थिक आणि तांत्रिक भागीदारी अधिक दृढ करण्यावर लक्ष केंद्रित केले जाणार आहे.

तर जपान दौऱ्यानंतर पंतप्रधान मोदी हे थेट चीनला रवाना होणार आहेत. मोदी ३१ ऑगस्ट ते १ सप्टेंबर या कालावधीत चीनमधील तियानजिन शहरात होणाऱ्या शांघाय सहकार्य संघटनेच्या(SCO) परिषदेत सहभागी होतील. खरंतर गलवानमधील उफाळलेल्या संघर्षानंतर पंतप्रधान मोदींचा हा पहिलाच चीन दौरा असणार आहे.

या दौऱ्यात एससीओच्या सदस्या देशांसोबत प्रादेशिक सुरक्षा, दहशतवाद आणि व्यापार यासारख्या मुद्य्यांवर चर्चा केली जाणार आहे. शिवाय, भारत आणि चीन संबंधांमध्ये स्थिरता आणि संवाद पुनर्संचयित करण्याचाही प्रयत्न केला जाईल.