नवी दिल्ली : नाशिकमध्ये अत्यंत धक्कादायक घटना घडली आहे. नाशिक शहरातील डॉ. झाकीर हुसेन रुग्णालयात ऑक्सिजनच्या टाकीला गळती झाल्याने तब्बल 22 रुग्णांचा तडफडून मृत्यू झाल्याची दुर्दैवी घटना घडली आहे. या संपूर्ण घटनेत उच्चस्तरीय चौकशी करण्याचे आदेश मुख्यमंत्री उद्धव ठाकरे यांनी दिले आहे. मृतांच्या वारसांना प्रत्येकी 5 लाख रुपये देण्याचे देखील त्यांनी जाहीर केले आहे. भारताचे पंतप्रधान नरेंद्र मोदी यांनी देखील या घटनेवर आपला शोक जाहीर केला आहे. पंतप्रधान मोदींनी म्हटलंय की, नाशिकच्या हॉस्पिटलमध्ये ऑक्सिजनच्या गळतीमुळे घटलेली घटना हृदयद्रावक आहे. यामध्ये झालेल्या जीवितहानीमुळे यातना झाल्या. मृतांच्या कुटुंबियांच्या दुखात मी सहभागी आहे.

मुख्यमंत्र्यांकडून उच्चस्तरीय चौकशीचे आदेश

मुख्यमंत्री उद्धव ठाकरे यांनी म्हटलंय की, नाशिकची ही घटना सर्वांसाठी केवळ धक्कादायक नाही तर प्रशासनाला या संपूर्ण लढ्यात आपल्याला अतिशय काळजी घेऊन जावे लागणार आहे हे शिकविणारी आहे. आज गेल्या वर्षभरापासून आपण कोविडच्या लाटेला सामोरे जात आहोत. उपलब्ध डॉक्टर्स, वैद्यकीय कर्मचारी हे रात्रंदिवस रुग्णांचे जीव वाचविण्यासाठी झटताहेत, अशा परिस्थितीत अशा निष्काळजीपणाने जीव जाणे मनाला अतिशय बोचणारे आहे. पुढे मुख्यमंत्री म्हणाले की , केवळ शोक सांत्वना करून चालणार नाही. अशा घटना भविष्यात घडू नये आरोग्य यंत्रणांचे मनोबल ज्यामुळे खच्ची होईल अशी कोणतीही घटना घडू नये यासाठी प्रशासनाने अतिशय काळजीपूर्वक आणि डोळ्यात तेल घालून काम केले पाहिजे. यापुढे प्रत्येक रुग्णालयांच्या ठिकाणी प्राणवायूच्या साठ्याची काळजी घेऊन त्याच्या सुयोग्य उपयोग व्हावा तसेच रुग्णांना प्राणवायू मिळण्यातल्या अडचणी तत्काळ दूर झाल्याच पाहिजेत, असे निर्देशही मुख्यमंत्र्यांनी दिले आहेत.