तुर्की आणि सिरियामध्ये नुकताच भीषण भूकंप झाला. या भूकंपाबद्दल बोलताना पंतप्रधान नरेंद्र मोदी भावूक झाले. पंतप्रधान मोदींना या भूकंपानंतर गुजरातमधल्या भूजमध्ये झालेल्या भूकंपाची आठवण झाली. या भूकंपातही हजारो लोकांचे बळी गेले होते.

पंतप्रधान मोदी आज भाजपाच्या खासदारांच्या बैठकीमध्ये बोलत होते. संसदेच्या अर्थसंकल्पीय अधिवेशनाच्या आधी ही बैठक झाली. यामध्ये बोलताना त्यांनी २००१ च्या भूज भूकंपाची आठवण काढली. त्यावेळी गुजरातचे मुख्यमंत्री असताना या भूकंपातून लोकांना वाचवण्यात आलेल्या आव्हानांविषयी त्यांनी भाष्य केलं आहे.

भारताने तुर्की आणि सिरीयाला मदत पाठवली असल्याचंही पंतप्रधान नरेंद्र मोदींनी सांगितलं. तुर्की आणि सिरीयामध्ये जवळपास ७.८ रिश्टर स्केल तीव्रतेचा भूकंप झाला. त्यामुळे ४००० हून अधिक नागरिकांचा मृत्यू झाला आहे. तुर्कीमध्ये जे काही चाललंय, ते आपण चांगलं समजू शकतो, जाणू शकतो, असं पंतप्रधान मोदी म्हणाले आहे.

२००१ मध्ये गुजरातमधल्या भूजमध्ये भूकंपामुळे हाहाकार माजला होता. जवळपास २० हजार नागरिकांचा मृत्यू झाला. तर दीड लाखांहून अधिक नागरिक जखमी झाले होते.