Micron to invest in india : पंतप्रधान नरेंद्र मोदी तीन दिवसांपासून अमेरिकेच्या दौऱ्यावर आहेत. काल अमेरिकेने बंगळूरु आणि अहमदाबाद येथे दुतावास सुरु करण्याची घोषणा केली आहे. आज अमेरिकेतून मोठी बातमी येत असून अमेरिकेची चिप कंपनी गुजरातमध्ये प्लांट सुरु करणार आहे.

भारताला सेमीकंडक्टर हब बनवण्याचं पंतप्रधान नरेंद्र मोदी यांचं स्वप्न आहे. त्यातच मोदी अमेरिकेच्या दौऱ्यावर आहेत आणि अमेरिकेची एक मोठी कंपनी भारतात प्रकल्प सुरु करणार असल्याचं जाहीर करण्यात आलेलं आहे. अमेरिकेची सेमीकंडक्टर कंपनी मायक्रॉन गुजरातमध्ये प्लांट टाकणार आहे. तशी घोषणा कंपनीच्या वतीने करण्यात आलेली आहे.

या प्रकल्पासाठी मायक्रॉन २.७ अरब डॉलर गुंतवणूक करणार आहे. पंतप्रधानांच्या अमेरिका दौऱ्यादरम्यानच ही घोषणा करण्यात आली. अमेरिकन मंत्रिमंडळाने एक नवीन सेमीकंडक्टर टेस्टिंग आणि पॅकेजिंग युनिटसाठी मायक्रॉनला भारतात गुंतवणूक करण्यास परवानगी दिली आहे.

विशेष म्हणजे पंतप्रधान नरेंद्र मोदी यांनी आपल्या अमेरिका दौऱ्यामध्ये मायक्रॉनचे सीईओ संजय मेहरोत्रा यांच्यासोबत बैठक घेऊन भारतात गुंतवणूक करण्याची मागणी केली, असं मीडिया रिपोर्टनुसार सांगण्यात येत आहे. कंपनीकडून जारी करण्यास आलेल्या स्टेटमेंटमध्ये गुजरातमध्ये कंपनी सेमीकंडक्टर टेस्ट आणि असेंबली प्लांट सुरु करणार आहे. दोन टप्प्यांमध्ये हा प्रकल्प विकसित करण्यात येणार आहे.

मायक्रॉन कंपनी ८२.५ कोटी डॉलर गुंतवणूक करणार आहे. बाकीची गुंतवणूक केंद्र आणि राज्य सरकार करणार असल्याची माहिती मिळत आहे. संजय मेहरोत्रा यांनी सांगितलं की, चालू वर्षामध्येच हा प्रकल्प उभारणीचं काम सुरु होईल. भारत सरकार आणि या प्रकल्पामध्ये सहभागी असणाऱ्या अधिकाऱ्यांचे त्यांनी आभार मानले.