भारतातील जी20 परिषदेच्या मोठ्या बैठकीचा आज पहिला दिवस आहे. दिल्लीमध्ये आज आणि उद्या ही बैठक पार पडणार आहे. यासाठी कित्येक देशांचे अध्यक्ष, राष्ट्रपती आणि पंतप्रधान भारतात दाखल झाले आहेत. या बैठकीची सुरुवात पंतप्रधान मोदींच्या भाषणाने झाली.

या भाषणामध्ये पंतप्रधान मोदींनी एका प्राकृत भाषेतील मंत्रामधून सर्व उपस्थितांना एक संदेश दिला. "प्रगती मैदानापासून काही किलोमीटर अंतरावर एक 2,500 वर्षे जुना स्तंभ आहे. या स्तंभावर प्राकृत भाषेत लिहिलं आहे, की - 'हेवं लोकशःहित मुखेति, अथः इयं नातेशु हेवं'. अर्थात, मानवतेचं हित आणि कल्याण सुनिश्चित होऊदे." असं पंतप्रधान म्हणाले.

अडीच हजार वर्षांपूर्वीच भारताने संपूर्ण जगाला मानव कल्याणाचा हा संदेश दिला होता. G20 समूह देखील याच दृष्टीने प्रयत्न करतो, त्यामुळे या संदेशाने आपल्या बैठकीची सुरुवात करूया असं पंतप्रधान मोदी म्हणाले.

सबका साथ-सबका विकास

यासोबतच पंतप्रधान मोदींनी जी20 सदस्यांना 'सबका साथ-सबका विकास-सबका विश्वास-सबका प्रयास' हा संदेश दिला. आपल्याला जगासमोर असणाऱ्या सर्व प्रश्नांना मिळून तोंड द्यायचं आहे. आणि पुढील पिढीसाठी वैश्विक समस्यांवर ठोस उपाययोजना करायची आहे असंही मोदी यावेळी म्हणाले.