नवी दिल्ली : मोदी आणि काश्मीरी नेत्यांमध्ये तब्बल साडेतीन तास चर्चा झाली आहे. कलम 370 हटवल्यानंतर पहिल्यांदाच अशी सविस्तर बैठक झाली आहे. दुपारी तीन वाजता ही बैठक सुरु झाली होती. पंतप्रधान मोदींच्या निवासस्थानी ही बैठक पार पडली.

जम्मू काश्मीरला संपूर्ण राज्याचा दर्जा देण्याचं आश्वासन पंतप्रधान नरेंद्र मोदींनी दिल्याची माहिती काश्मीरी नेत्यांनी दिली आहे. मतदार पुनर्रचनेनंतर निवडणुका घेतल्या जातील, असंही आश्वासन त्यांनी दिलं आहे. जम्मू काश्मीरमधील वार्ड पुनरर्चनेत स्थानिक नेत्यांनी सहभाग घ्यावा, असं आवाहन मोदींनी या बैठकीत केल्याचं समजत आहे.

यावेळी पंतप्रधानांनी म्हटलंय की, राजकीय मतभेद असतील पण प्रत्येकाने राष्ट्रहितासाठी काम केले पाहिजे जेणेकरून जम्मू-काश्मीरच्या लोकांना फायदा होईल. जम्मू-काश्मीरमधील सर्वांसाठी सरंक्षण आणि सुरक्षिततेचे वातावरण सुनिश्चित करण्याची गरज असल्याचे त्यांनी नमूद केले. पंतप्रधानांनी म्हटलंय की त्यांना 'दिल्ली की दुरी' आणि 'दिल की दुरी' काढून टाकायची आहे.

यावेळी काँग्रेसचे नेते गुलाम नबी आझाद यांनी म्हटलंय की, जवळजवळ 80 टक्के पक्ष कलम 370 वर बोलले. मात्र, हे प्रकरण सध्या न्यायालयात आहे. काँग्रेसच्या मागण्या पुढीलप्रमाणे आहेत. लवकरात लवकर संपूर्ण राज्याचे दर्जा, लोकशाही स्थापन करण्यासाठी निवडणुका, काश्मिरी पंडितांचे पुनर्वसन, सर्व राजकीय अटकेत असलेल्यांना सोडण्यात यावं आणि जमीन, रोजगाराची हमी देण्यात यावी या सर्व गोष्टींचा समावेश आहे.

जम्मू काश्मीरमधील अपनी पार्टीचे नेता अल्ताफ बुखारी यांनी म्हटलं की, चर्चा अत्यंत चांगल्या वातावरणात पार पडली. पंतप्रधानांनी सगळ्या नेत्यांचे मुद्दे ऐकून घेतले. त्यांनी म्हटलंय की, वार्ड पुनर्रचनेची प्रक्रिया पूर्ण झाल्यानंतर निवडणुकीची प्रक्रिया सुरु केली जाईल. पुढे त्यांनी म्हटलंय की, पुनर्रचनेची प्रक्रियेची अंतिम तारीख अद्याप ठरलेली नाहीये. याशिवाय लवकच निवडणूका करण्याबाबत देखील चर्चा पार पडली.