नवी दिल्ली : मणिपूरच्या विकासाच्या(manipur) आड येणारे सर्व अडथळे दूर झाले असून या राज्याचा विकास वेगाने सुरु आहे, असा दावा पंतप्रधान नरेंद्र मोदी (pm modi)यांनी आज केला. या राज्याला गेली ७० वर्षे अविकसीत ठेवणाऱ्या शक्तींना डोके वर काढू देऊ नका, असे आवाहन त्यांनी आज केले. विकासाच्या ‘डबल इंजिन’मुळे राज्याच्या विकास वेगाने होत असल्याचेही मोदी म्हणाले.

मणिपूरमध्ये विधानसभा निवडणूक होत असून आज या राज्याचा स्थापना दिवसही आहे. ही संधी साधत पंतप्रधान नरेंद्र मोदींनी दूरदृश्‍य प्रणालीच्या माध्यमातून मणिपूरच्या जनतेशी संवाद साधला. स्थापना दिनानिमित्त जनतेला शुभेच्छा देताना मोदी म्हणाले की,‘‘मणिपूरमधील जनतेचा शांतता आणि विकासावर हक्क आहे. वारंवार होणारे बंद, रास्ता रोको यांपासूनही सुटका मिळविण्याचा त्यांना हक्क आहे. हे सर्व त्यांना मुख्यमंत्री एन. बिरेन सिंह यांच्या नेतृत्वाखाली मिळाले आहे. ’’ मणिपूरमध्ये सध्या भाजप सत्तेवर आहे. या राज्यात २७ फेब्रुवारी आणि तीन मार्च अशा दोन टप्प्यांत मतदान होणार आहे. मोदी म्हणाले,‘‘मणिपूरच्या विकासाच्या मार्गातील सर्व अडथळे दूर झाले असून हा राज्याच्या विकासाचा अमृतकाळ आहे. मणिपूरला देशाचे क्रीडाकेंद्र बनविण्याची केंद्र सरकारची इच्छा आहे.’’