PM Narendra Modi Birthday : पंतप्रधान नरेंद्र मोदींच्या वाढदिवसानिमित्त शनिवारी जनतेनं त्यांना खास गिफ्ट दिलं. पंतप्रधानांच्या वाढदिवसानिमित्त सुरू झालेल्या रक्तदान मोहिमेत (Blood Donation Camp) लोकांनी उत्स्फूर्त सहभाग घेतला आणि जागतिक विक्रम केला. या एका दिवसात एक लाखाहून अधिक लोकांनी रक्तदान केल्याची माहिती आरोग्य मंत्रालयानं दिलीय.

यापूर्वी 2014 मध्ये एकाच दिवसात 87,059 लोकांनी रक्तदान केलं होतं. केंद्रीय आरोग्य मंत्री मनसुख मांडविया (Health Minister Mansukh Mandaviya) यांनी ट्विट करून ही माहिती दिली. आरोग्य मंत्री मांडविया यांनी ट्विटमध्ये लिहिलंय, 'पंतप्रधान नरेंद्र मोदींच्या वाढदिवसानिमित्त शनिवारी 15 दिवसांची रक्तदान मोहीम सुरू झाली आणि पहिल्याच दिवशी एक लाखाहून अधिक लोकांनी रक्तदान केलं, हा एक 'वर्ल्ड रेकॉर्ड' आहे. यापूर्वी 6 सप्टेंबर 2014 रोजी 87,059 जणांनी रक्तदानात सहभागी होऊन विक्रम केला होता.

तीनशे शहरांत 556 रक्तदान शिबिरं

हा कार्यक्रम अखिल भारतीय तेरापंथ युवक परिषदेनं आयोजित केला होता आणि त्यासाठी भारतातील तीनशे शहरांमध्ये 556 रक्तदान शिबिरं आयोजित करण्यात आली होती. मांडविया यांनी स्वतः दिल्लीच्या सफदरजंग हॉस्पिटलमधील एका शिबिरात रक्तदान केलं होतं आणि लोकांना 'रक्तदान अमृत महोत्सवा'वर रक्तदान करण्यासाठी आरोग्य सेतू अॅप (Aarogya Setu App) किंवा ई-रक्तकोश पोर्टलवर नोंदणी करण्याचं आवाहन केलं होतं.

रक्त अमृत महोत्सव म्हणजे काय?

या मोहिमेची सुरुवात पंतप्रधान मोदींच्या वाढदिवसादिवशी म्हणजेच, 17 सप्टेंबर रोजी झाली. केंद्रीय आरोग्य मंत्रालयानं या कार्यक्रमाचं आयोजन केलं आहे. ही मोहीम 15 दिवस चालणार आहे. रक्तदान करण्यास इच्छुक असलेले लोक रक्तपेढीच्या पोर्टलवर नोंदणी करू शकतात. यासाठी आरोग्य सेतू अॅपवरही नोंदणी करता येईल.