Atiq Ahmed News : अतिक आणि अशरफ यांच्यावर गोळ्या घालणाऱ्या शूटर्सनी १३ एप्रिल रोजी रात्री एका हॉटेलमध्ये चेक इन केलं होतं. त्या हॉटेलमध्ये पोलिसांना आता काही वस्तू सापडल्या आहेत.

माफीया डॉन अतिक अहमद आणि अशरफ यांची हत्या केल्यानंतर रोज नवनवे खुलासे होत आहेत. तिनही मारेकऱ्यांविषयी पोलिस वेगवेगळी माहिती गोळा करीत आहेत. हे तिनही मारेकरी अतिक आणि अशरफचा दोन दिवस पाठलाग करीत होते.

हेही वाचाः संतुलित आहारातून रोखा फॅटी लिव्हरचा आजार

तिनही आरोपी हे प्रयागराज येथील स्टे इन हॉटेलमध्ये रुम नंबर २०३ मध्ये थांबले होते. या तिघांची नावं लवलेश तिवारी, सनी सिंह आणि अरुण मौर्य अशी आहेत.

'आज तक'च्या रिपोर्टनुसार अतिक आणि अशरफला गोळ्या घालणारे शुटर्स १३ एप्रिल रोजी हॉटेलमध्ये आले होते. हे तिघेही अतिकबद्दल संपूर्ण माहिती गोळा करीत होते. त्यांचं मेडिकल चेकअप कधी, कुठे होणार याबद्दल त्यांच्याकडे माहिती होती.

१५ एप्रिल रोजी रात्री प्रयागराज येथील कॉल्विन रुग्णालयाबाहेर मीडियाच्या कॅमेऱ्यांसमोर या तिघांनी अतिक आणि अशरफ यांची हत्या केली. या घटनेनंतर देशभर राजकारण सुरु झालं. आरोप-प्रत्यरोप सुरु झाले. पोलिसांनी या प्रकरणाची कसून चौकशी सुरु केली आहे.

अतिक आणि अशरफला गोळी मारणाऱ्या तिन्ही आरोपी ज्या हॉटेलमध्ये होते त्याची एसआयटीच्या अधिकाऱ्यांनी तपासणी केली. यामध्ये त्यांना मोबाईल फोन, मोबाईल चार्जर मिळालं. मात्र या मोबाईलमध्ये सीम कार्ड नव्हतं. पोलिस सीडीआरवरुन पुढील तपास करीत आहेत. त्यामुळे लवकरच तिन्ही शुटर्सबद्दल पोलिस मोठा खुलासा करण्याच्या तयारीत असल्याची माहिती आहे.