उत्तर गोव्यात (Goa) एका 32 वर्षीय व्यक्तीला ब्रिटीश महिलेवर बलात्कार केल्याप्रकरणी अटक करण्यात आलीय. अरंबोल बीचजवळील (Arambol Beach) प्रसिद्ध 'स्वीट लेक'मध्ये महिलेसोबत बलात्काराची घटना घडल्याची माहिती गोवा पोलिसांनी (Goa Police) सोमवारी दिली. एका वरिष्ठ पोलीस अधिकाऱ्यानं सांगितलं की, स्थानिक रहिवासी आरोपी जोएल व्हिन्सेंट डिसूझा यानं 2 जून रोजी महिला समुद्रकिनाऱ्यावर आराम करत असताना तिच्यावर बलात्कार केला.

पतीसोबत गोव्यात आलेल्या पीडित महिलेनं (British Woman) सोमवारी पोलिसांत तक्रार दाखल केली. पोलीस अधिकाऱ्यानं सांगितलं की, आरोपीला अटक करण्यात आली असून या प्रकरणाचा तपास सुरू आहे. गोव्यात परदेशी महिलेवर बलात्काराची ही पहिलीच घटना नाहीय. यापूर्वी 12 मे रोजी भारतात आलेल्या रशियन कुटुंबातील 12 वर्षीय मुलीवर हॉटेलमध्ये बलात्कार झाल्याची घटना समोर आली होती.

वास्तविक, रशियन कुटुंब गोव्यातील अरंबोलमधील एका रिसॉर्टमध्ये थांबलं होतं. मुलीला हॉटेलच्या खोलीत सोडून कुटुंबीय बाजारात गेलं होतं. दरम्यान, खोलीत मुलगी एकटी असल्याचं पाहून रूम बाॅयनं तिच्यावर बलात्कार केला. आरोपीनं आधी तरुणीवर स्विमिंग पूलमध्ये बलात्कार केला. त्यानंतर खोलीत नेऊन पुन्हा हा प्रकार घडवून आणला. याप्रकरणी गोवा पोलिसांनी आरोपीला कर्नाटकातून अटक केली होती.