- एम.ए.एस. कुमार

हैदराबाद : तेलंगणात मुख्यमंत्री रेवंत रेड्डी यांच्या नेतृत्वाखालील काँग्रेस सरकार माजी मुख्यमंत्री के.चंद्रशेखर राव यांची राज्यावरील ओळख पुसून टाकण्याच्या प्रयत्नात आहे. केसीआर यांच्या सत्ताकाळात तयार करण्यात आलेले राज्यचिन्ह आणि राज्यातील जनतेची प्रतिकात्मक देवी तेलंगण थल्लीतही बदल करण्यात येणार आहे. यामुळे राज्यात वादाला तोंड फुटले आहे. जनतेमध्ये वाढता असंतोष पाहून सरकारने एक पाऊल मागे घेतले आहे.

तेलंगणाच्या अधिकृत चिन्हांमध्‍ये बदल करताना राज्यातील सार्वजनिक जीवन, लोकशाही, तेलंगण आंदोलन, त्यासाठी दिलेले बलिदान आदी गोष्टींचे प्रतिबिंब नव्या चिन्हांमध्ये दिसेल, अशी त्याची रचना केली आहे. येथील राज्यचिन्हात ऐतिहासिक चारमिनार आणि काकतीय राजांच्या काळातील कमानीची मुद्रा आहे.

ते हटविण्याचा विचार रेड्डी करीत होते. तेलंगणच्या स्थापनादिनानिमित्त २ जूनला आयोजित केलेल्या समारंभात नवे प्रतीक, तेलंगण थल्लीची प्रतिमा आणि राज्यगीताचे अनावरण करण्याची योजना सरकारने आखली होती. पण २ जूनला ‘जय जय हो तेलंगण’ हे राज्यगीत प्रकाशित करण्यास आणि राज्यचिन्हात बदल करण्यास स्थगिती दिली आहे.

वाहन क्रमांकातही बदल

मुख्यमंत्र्यांनी घेतलेला आणखी एक निर्णय म्हणजे वाहन नोंदणीच्या क्रमांकाच्या मालिकेत बदल करणे. तेलंगणात नोंदणी झालेल्या वाहनांवरील अक्षरांमध्ये आता ‘टीएस’ ऐवजी ‘टीजी’ असा बदल केला आहे.

राज्यगीताच्या संगीतकाराबद्दल आक्षेप

‘जय जय हो तेलंगण’ या गीताला ऑस्करविजेते संगीत दिग्दर्शक एम. एम. किरवानी यांनी संगीतबद्ध केले आहे. या गीताला संगीत देण्यासाठी किरवानी यांची निवड केल्याने सरकारवर टीका होत आहे. कारण किरवानी आंध्र प्रदेशातील आहेत. ही जबाबदारी तेलंगणमधील संगीतकाराला द्यायला हवी होती, असे काहींचे म्हणणे आहे.