भोपाळ : भोपाळ येथे प्रकाश झा निर्मित असलेल्या 'आश्रम -३' या वेब सीरिजच्या चित्रीकरणाच्या वेळी हिंसा घडली आहे. वादाचे कारण आहे वेब सीरिजचे नाव. नाव बदलण्याची मागणी बजरंग दलाकडून होत आहे. रविवारी (ता.२४) बजरंग दलाच्या कार्यकर्त्यांनी झा यांच्या चेहऱ्याला शाई लावून आश्रमच्या सेटचे नुकसान केले आहे. आज मध्य प्रदेशचे गृहमंत्री यांनी या घटनेवर प्रतिक्रिया दिली आहे. गृहमंत्री नरोत्तम मिश्रा म्हणाले, की वेब सीरिजच्या नाव बदलाच्या मागणीला माझा पाठिंबा आहे. तुम्ही धाडस करुन दुसरे नाव देऊ शकत नाहीत का ?, असा प्रश्न त्यांनी प्रकाश झा यांना केला आहे. (Ashram-3 Web Series)

अशा काही गोष्टी (Prakash Jha) करु नका, ज्याच्यामुळे अडचणी निर्माण होतील. आश्रम वेब सीरिजच्या सेटवर जे काही घडले, ते चुकीचे आहे. चार जणांना अटक करण्यात आली आहे. तुम्ही जे काही करत आहात ते चुकीचे आहे, त्यावर विचार करा, असा सल्ला गृहमंत्री मिश्रा यांनी झा यांना दिला आहे. आश्रम या वेबसीरिजमध्ये अभिनेता बाॅबी देओल हा मुख्य भूमिकेत आहे.