नवी दिल्ली- सर्वोच्च न्यायालयातील ज्येष्ठ वकील प्रशांत भूषण यांनी आपल्या एका टि्वटमधील चुकीबाबत खेद व्यक्त केला आहे. प्रशांत भूषण यांनी 21 ऑक्टोबर रोजी सरन्यायाधीश शरद बोबडे यांच्यावर टीका करणारे एक टि्वट केले होते. मध्य प्रदेश सरकारने सरन्यायाधीशांना विशेष हेलिकॉप्टर उपलब्ध करुन दिले होते. त्यावरुन त्यांनी टीका केली होती. 

काय म्हटलं होतं टि्वटमध्ये

प्रशांत भूषण यांनी आपल्या टि्वटमध्ये म्हटले होते की, 'कान्हा राष्ट्रीय उद्यानच्या दौऱ्यावेळी सरन्यायाधीशांनी विशेष हेलिकॉप्टरची सेवा घेतली आहे, ते देखील अशा वेळी जेव्हा पक्ष बदलणारे खासदार, आमदार अपात्र ठरवल्याचा खटला त्यांच्यासमोर प्रलंबित आहे. मध्य प्रदेश सरकार या खटल्यावर अवलंबून आहे.' आता आपल्या या टि्वटबाबत त्यांनी खेद व्यक्त केला आहे. 

प्रशांत भूषण यांनी खेद व्यक्त करत टि्वट केले की, मध्य प्रदेशमध्ये काँग्रेस सोडून शिवराजसिंह सरकारमध्ये मंत्री झालेल्या काँग्रेस आमदारांच्या मतदारसंघात मतदान झाले. शिवराज सरकार टिकणार की नाही, हे या आमदारांच्या विजयावर अवलंबून आहे. सरन्यायाधीशांच्या न्यायालयात प्रलंबित असलेल्या निर्णयावर नाही. मी टि्वटमध्ये माझ्या चुकीवर खेद व्यक्त करतो. 

हेही वाचा- Corona Vaccine: लशीकरणाची तयारी सुरु, SMSद्वारे मिळणार माहिती; जाणून घ्या कुठे मिळणार लस

दरम्यान, सरन्यायाधीशांवर आरोप करण्याची प्रशांत भूषण यांची पहिली वेळ नाही. यापूर्वीही त्यांनी असे केले आहे. याचवर्षी 31 ऑगस्ट रोजी न्यायालयाचा अवमान केल्याप्रकरणी त्यांना 1 रुपयांचा दंड ठोठावला होता. भूषण यांनी त्यावेळी विद्यमान सरन्यायाधीश आणि इतर 4 माजी सरन्यायाधीशांबाबत 2 वादग्रस्त टि्वट केले होते. 

हेही वाचा- भारताने पाकिस्तानी उच्चायुक्तांना बोलावून कडक शब्दांत समज दिली