जयपूर- राजस्थानमध्ये भाजपचा मुख्यमंत्री पदाचा उमेदवार कोण असेल यावरुन बरीच चर्चा सुरु आहे. या प्रश्नावरुन भाजप पक्षामध्येही बरीच खलबतं सुरु होती. या पार्श्वभूमीवर पंतप्रधान मोदी यांनी राजस्थानमधील मुख्यमंत्री पदाच्या उमेदवाराबाबत मोठा खुलासा केला आहे. भाजप कोणत्याच नेत्याला समोर ठेवून विधानसभा निवडणूक लढवणार नाही, असं मोदी म्हणाले.

राजस्थानमध्ये विजय मिळाल्यानंतरच याबाबतचा निर्णय घेण्यात येईल, असं मोदी म्हणाले आहेत. पंतप्रधानांनी सोमवारी चित्तोडगडच्या सभेमध्ये बोलताना याबाबत माहिती दिली आहे. विशेष म्हणजे मोदी याची घोषणा करताना माजी मुख्यमंत्री आणि राजस्थानमधील मुख्यमंत्री पदाच्या प्रबळ दावेदार वसुंधरा राजे या व्यासपीठावरच उपस्थित होत्या.

पंतप्रधान मोदींनी स्पष्ट केलं की,कोणताही चेहरा समोर न ठेवता निवडणूक लढवली जाईल. मोदी म्हणाले, 'या निवडणुकीत आपला एकच चेहरा आहे, तो म्हणजे कमळ. या कमळालाच प्रचंड बहुमताने विजयी करा. कमळाच्या नेतृत्वातच आपल्याला पुढे जायचंय आहे आणि राजस्थानमध्ये विजय प्राप्त करायचाय. आपली संकल्प कमळ आहे आणि उमेदवारही कमळ आहे. कमळ उगवणार आणि भाजप जिंकणार.'

राजस्थानमध्ये माजी मुख्यमंत्री वसुंधरा राजे आणि केंद्रीय मंत्री गजेंद्र सिंग शेखावत यांना मुख्यमंत्री पदासाठी प्रबळ उमेदवार माणलं जात होतं. वसुंधरा राजे आपले नाव घोषित व्हावे यासाठी आग्रही होत्या. पक्ष नेतृत्वावर त्या नाराज असल्याच्याही चर्चा रंगल्या होत्या. पण, सध्या त्यांनी तलवार म्यान केल्याचं सांगितलं जातंय.

पंतप्रधान नरेंद्र मोदी यांनी सभेत बोलताना काँग्रेसवर जोरदार हल्लाबोल केला. राजस्थान गुन्हेगारीमध्ये अव्वल आहे. महिलांवर आणि दलितांवरील अत्याचारात प्रथम आहे. दंगली सर्वात जास्त राजस्थानमध्ये होतात. काँग्रेसने राज्याला अधोगतीकडे नेले आहे. आमचे सरकार राज्यात आल्यास महिलांच्या संरक्षणाला प्राधान्य दिले जाईल, असं ते म्हणाले. (Latest Marathi News)