केदारनाथ: पंतप्रधान नरेंद्र मोदी आज केदारनाथ दौऱ्यावर आहेत. केदारनाथमध्ये पंतप्रधान मोदींचा जवळपास चार तासांचा कार्यक्रम आहे. या दरम्यान पंतप्रधान तिथे अनेक विकासकामांचं तसेच योजनांचं लोकार्पण करणार आहेत तसेच भूमीपूजन करणार आहेत. यामध्ये पंतप्रधान मोदी आता आदि गुरु शंकराचार्य यांच्या समाधी स्थळाचं लोकार्पण तसेच त्यांच्या मूर्तीचं अनावरण केलं आहे. 2013 साली आलेल्या मोठ्या प्रलयादरम्यान या समाधीचं नुकसान झालं होतं. पंतप्रधान केदारनाथमध्ये सुरु असलेल्या विकासकामांचा देखील आढावा घेणार आहेत.

केदारनाथच्या या दौऱ्याच्या निमित्ताने मोदी एका महिन्यामध्ये दुसऱ्यांदा उत्तराखंडला गेले आहेत. पंतप्रधान मोदींनी या ठिकाणी बाबा केदारनाथावर रुद्राभिषेक करत भक्तीभावाने पुजा केली. केदारनाथाच्या मंदिरामध्ये पूजा केल्यानंतर ते २५० कोटींच्या केदारपुरी पुनर्विकास योजनांचं उद्घाटन करणार आहेत. मोदी यांच्या हस्ते केदारपुरी पुनर्विकासच्या दुसऱ्या टप्प्यामधील प्रकल्पांचे भूमिपूजन केलं जाणार आहे. या योजना १५० कोटी रुपयांच्या आहेत.