नवी दिल्ली : कोरोनाचं सावट थोडंफार ओसरलेलं असताना देशवासीय यंदा उत्साहाने दिवाळी साजरी करत आहेत. कोरोनाच्या नियमावलीचे पालन करुन ही दिवाळी साजरी करण्याचं आवाहन शासनाकडून करण्यात आलं आहे. गेली दोन वर्षे दिवाळी चिंतातून वातावरणात गेली असली तरी यंदा थोडाफार उत्साह दिसून येतो आहे. देशवासीयांच्या याच उत्साहास अधिक प्रोत्साहन देण्यासाठी पंतप्रधान नरेंद्र मोदी यांनी दिवाळीच्या शुभेच्छा दिल्या आहेत.

पंतप्रधान मोदींनी ट्विट करत या सदिच्छा दिल्या आहेत. त्यांनी ट्विट करुन म्हटलंय की, दिवाळीच्या या पवित्र वेळी देशवासीयांना खूप साऱ्या हार्दिक शुभेच्छा! माझी इच्छा आहे की, प्रकाशाचे हे पर्व तुम्हा सर्वांच्या आयुष्यात सुख, संपन्नता आणि सौभाग्य घेऊन येवो, अशा सदिच्छा! Wishing everyone a very Happy Diwali., असं त्यांनी म्हटलंय.

दुसरीकडे देशाचे गृहमंत्री अमित शहा यांनी देखील देशवासीयांना दिवाळीच्या सदिच्छा दिल्या आहेत. त्यांनी म्हटलंय की, सर्वांना दीपावलीच्या हार्दिक शुभेच्छा. प्रकाश आणि आनंदाचे हे महापर्व सर्वांच्या आयुष्यात एक नवी उर्जा, प्रकाश, आरोग्य आणि समृ्द्धी घेऊन येवो!