नवी दिल्ली -देशभरात रेल्वेतील खासगी गुंतवणूक वाढविण्यासाठी केंद्र सरकारने आता कंपन्यांना आर्थिक प्रलोभने दाखवायला सुरवात केली आहे. या खासगी चालक कंपन्यांना भविष्यामध्ये भाडे आकारण्याची परवानगी देण्यात येईल, असे रेल्वे मंडळाचे अध्यक्ष व्ही. के. यादव यांनी सांगितले. ज्या मार्गावर या रेल्वे गाड्या धावणार आहेत त्याच मार्गावर वातानुकूलित बस गाड्या आणि विमाने यांची सुविधा देखील आहे, हे त्यांनी भाडे आकारण्यापूर्वी लक्षात ठेवावे असे यादव यांनी नमूद केले. 

ताज्या बातम्यांसाठी डाऊनलोड करा ई-सकाळचे ऍप

भारतामध्ये राजकीयदृष्ट्या रेल्वे हे माध्यम खूप संवेदनशील आहे, आजमितीस ऑस्ट्रेलियाची लोकसंख्या जेवढी आहे तेवढी मंडळी रोज आपल्याकडे गाड्यांमधून प्रवास करत असतात. गरीब जनतेसाठी हे वाहतुकीचे महत्त्वाचे माध्यम आहे. आतापर्यंत केवळ नोकरशहांचे दुर्लक्ष आणि अपुरे मनुष्यबळ यामुळे रेल्वेच्या नेटवर्कचा पुरेपूर वापर होऊ शकला नाही अशी खंतही त्यांनी व्यक्त केली. 

म्हणून खासगीकरण 
कोरोनामुळे रेल्वेच्या अर्थकारणाला मोठा तडाखा बसला असून मागील चार दशकांमध्ये प्रथमच ही यंत्रणा एवढ्या मोठ्या प्रमाणावर कोंडीत सापडली आहे. रेल्वेला आर्थिक बूस्टर देण्यासाठी केंद्र सरकारने हे क्षेत्र खासगी उद्योगांसाठी खुले करण्याचा निर्णय घेतला आहे. आलस्टम एसए, बॉम्बर्डायर, जीएमआर इन्फ्रास्ट्रक्चर आणि अदानी एंटरप्रायजेस या बड्या कंपन्यांनी गुंतवणूक करण्याची तयारी दर्शविली आहे. 

जगभरातील बातम्या वाचण्यासाठी येथे क्लिक करा

मोठी गुंतवणूक येणार 
खासगी कंपन्यांच्या माध्यमातून उभारल्या जाणाऱ्या प्रकल्पांमुळे येत्या पाच वर्षांमध्ये या क्षेत्रात ७.५ अब्ज डॉलर्सची गुंतवणूक होणार आहे. देशातील पॅसेंजर रेल्वेगाड्यांचा वेग वाढविण्याचा निर्णयही सरकारने घेतला आहे. जुलैपर्यंत देशातील १५१ मार्गांवर खासगी कंपन्यांच्या माध्यमातून गाड्या चालविण्याचा सरकारचा विचार असून त्यासाठी कंपन्यांकडून प्रस्ताव देखील मागविण्यात आले आहेत. 

देशभरातील बातम्या वाचण्यासाठी येथे क्लिक करा