हैदराबाद : आंध्र प्रदेशमध्ये पंतप्रधान नरेंद्र मोदी (Narendra Modi) यांची सुरक्षा भेदल्याचे एक मोठे प्रकरण समोर आले आहे. पंतप्रधानांच्या हेलिकॉप्टरजवळ (helicopter) काळे फुगे दिसले. निषेध म्हणून हे फुगे सोडण्यात आल्याचे बोलले जात आहे. मात्र, याबाबत सुरक्षा अधिकाऱ्यांकडून अद्याप काहीही सांगण्यात आलेले नाही.

प्राप्त माहितीनुसार, हे फुगे काँग्रेस (Congress) कार्यकर्त्यांनी सोडले. मोठ्या प्रमाणात हे फुगे आकाशात दिसले. याआधी पंजाब विधानसभा निवडणुकीदरम्यान पंतप्रधान नरेंद्र मोदी यांची सुरक्षा भेदल्याची घटना घडली होती. पंतप्रधान नरेंद्र मोदी (Narendra Modi) पठाणकोटमध्ये रॅलीसाठी जात होते. परंतु, वाटेत त्यांच्या ताफ्याला अडवले होते.

यानंतर आंदोलकांनी घेरलेला पंतप्रधान नरेंद्र मोदी यांचा सुरक्षा काफिला तेथून परतला होता. या मुद्द्यावर केंद्र सरकारने पंजाब सरकारकडून उत्तरही मागवले होते. नंतर पंजाबच्या तत्कालीन काँग्रेस सरकारनेही याबाबत खंत व्यक्त केली होती.

पंतप्रधान मोदींचे हेलिकॉप्टर जिथून टेकऑफ होणार होते तेथे काँग्रेस कार्यकर्ते आंदोलन करीत होते. त्यांच्या हातात काळे फुगे आणि फलक होते. ते पंतप्रधान मोदींवर निशाणा साधत घोषणाबाजी करीत होते.

काँग्रेसच्या तीन कार्यकर्त्यांनी पंतप्रधानांच्या हेलिकॉप्टरपासून सुमारे दोन किलोमीटर अंतरावरून फुगे सोडले होते. याप्रकरणी तिघांना अटक करण्यात आली असून, गुन्हाही दाखल करण्यात आला आहे, असे विजयवाडा आयुक्त कांठी राणा यांनी सांगितले. अल्लुरी सीताराम राजू यांच्या जयंतीनिमित्त आयोजित कार्यक्रमात सहभागी होण्यासाठी पंतप्रधान आंध्र प्रदेशात पोहोचले होते. त्यांनी आदिवासी स्वातंत्र्यसैनिकाच्या ३० फूट उंच पुतळ्याचे अनावरण केले.