लुधियाना - विधानसभा निवडणुकीच्या आधी पंजाबमध्ये राजकीय वातावरण तापलं आहे. एका बाजुला काँग्रेसमध्ये अंतर्गत धुसफूस सुरु आहे. तर दुसरीकडे आम आदमी पक्षाचे अध्यक्ष आणि दिल्लीचे मुख्यमंत्री राज्याच्या दौऱ्यावर आहेत. अकाली दलाने भाजपशी काडीमोड केल्यानंतर बसपाशी हात मिळवला आहे. दरम्यान, अरविंद केजरीवाल यांच्या उपस्थितीत माजी आयजी कुंवर प्रताप विजय यांनी आपमध्ये प्रवेश केला आहे.

आम आदमी पक्षाचा मुख्यमंत्री पदाचा उमेदवार हा शीख समुदायातील असेल अशी घोषणा केजरीवाल यांनी केली. अख्ख्या पंजाबला त्याच्यावर गर्व असेल असंही केजरीवाल यावेळी म्हणाले. कुंवर विजय प्रताप यांच्या पक्षप्रवेशानंतर बोलताना केजरीवाल म्हणाले की, कुंवर विजय प्रताप हे राजकारणी नाहीत. त्यांना सर्वसामान्यांचा पोलिसवाला म्हटलं जात होतं. आपण सर्वजण इथं देशाची सेवा करण्यासाठी आहोत. यासाठी त्यांनी आम आदमी पक्षात प्रवेश केला असल्याचं केजरीवाल यांनी म्हटलं.

पंजाबच्या राजकारणात ही मोठी घटना असल्याचं म्हटलं जात आहे. माजी आयजी कुंवर विजय प्रताप हे 1998 च्या बॅचचे आय़पीएस अधिकारी आहेत. त्यांनी कोटकपूरा प्रकरणाचा तपास केला होता. विशेष तपास पथकातील ते वरिष्ठ सदस्य होते. एसआयटीचा रिपोर्ट पंजाब आणि हरियाणा उच्च न्यायालयाने फेटाळून लावून नव्या एसआयटीची स्थापना करण्याचे आदेश दिले होते. यानंतर कुंवर विजय प्रताप यांनी स्वेच्छा निवृत्ती घेण्यासाठी अर्ज केला होता. त्याला आधी मुख्यमंत्री अमरिंदर सिंग यांनी फेटाळलं होतं. मात्र नंतर स्वेच्छानिवृत्तीचा अर्ज स्वीकारला होता.

स्वेच्छानिवृत्तीनंतर कुंवर विजय प्रताप सिंह हे राजकारणात येतील अशी चर्चा सुरु होती. निवडणुका जवळ येताच या चर्चेला उधाण आले होते. अखेर सोमवारी आपमध्ये प्रवेश केल्यानंतर चर्चांना पूर्णविराम मिळाला आहे.