चंडीगड: आम आदमी पक्षाची सत्ता पंजाबमध्ये पहिल्यांदाच आली आहे. निर्विवाद बहुमत मिळवत आम आदमी पक्षाने देशासमोर आपला करिश्मा सादर केला आहे. आपकडून मुख्यमंत्री पदाचे दावेदार असणारे भगवंत मान आता पंजाबचे २५ वे मुख्यमंत्री होणार आहेत. त्यांचा शपथविधी आज बुधवारी नवांशहरमध्ये सकाळी ११:30 वाजता सुरु होईल. पंजाबचे राज्यपाल बनवारी लाल पुरोहित त्यांना मुख्यमंत्री पदाची शपथ देतील. .या समारंभामध्ये दिल्लीच्या मुख्यमंत्री अरविंद केजरीवाल यांच्यासहित अनेक राजकीय नेते हजर राहणार आहेत.

या समारंभाला खास बनवण्यासाठी विशेष तयारी करण्यात आली आहे. संपूर्ण पंजाबमधून दोन लाखांहून अधिक लोक येण्याची शक्यता व्यक्त केली जाात आहे. शहीद स्मारकाच्या मागे एक लाख लोकांच्या थांबण्याची व्यवस्था केली आहे. तर स्मारकेच्या जागेवर एक लाख लोकांच्या थांबण्याची व्यवस्था केली गेली आहे. स्मारकाच्या जागेवर साडेसहा एकर भागामध्ये मांडव घालण्यात आला आहे. या शपथविधीच्या आधीच भगवंत मान यांनी एक व्हिडीओ जाहीर करत लोकांना आमंत्रण दिलं आहे. या व्हिडीओमध्ये त्यांनी म्हटलंय की, "16 मार्च रोजी खटकर कलानमध्ये पंजाबच्या मुख्यमंत्रिपदाचा शपथविधी सोहळा होणार आहे. फक्त मीच नाही तर राज्यातील 3 कोटी लोकसंख्या माझ्यासोबत शपथ घेणार आहे. आम्ही सगळे स्वातंत्र्यसैनिक असलेल्या भगतसिंग यांचा वारसा एकत्रितपणे पुढे नेऊ. मी एकटा शपथ घेणार नाही. तुम्ही सर्वजण मुख्यमंत्र्यांची शपथ घ्या. हे तुमचे सरकार असेल." खटकर कलान हे भगतसिंग यांचं गाव आहे.

अशी आहे तयारी

या सोहळ्यासाठी आम आदमी पक्षाने जोरदार तयारी केली आहे. दरम्यान, मुख्यमंत्र्यांचा उद्या शपथविधी असल्यानं आज पंजाबमधील कोविड-१९ चे सर्व नियम मागे घेतले आहेत. भगवंत मान यांच्या शपथविधीदरम्यान विशेष सुरक्षा व्यवस्था तैनात करण्यात येणार आहे. कार्यक्रमस्थळी विशेष चौक्या लावण्यात आल्या आहेत. यासोबतच सीआयडी आणि इतर गुप्तचर यंत्रणांची देखील या सोहळ्यावर पूर्ण नजर असणार आहे. या ऐतिहासिक शपथविधीसाठी राज्यातील कोविड-१९ चे निर्बंधांत शिथिलता देण्यात आली आहे.