राहुल गांधी यांनी स्वत:ची चिंता करावी, माझी चिंता करु नये. असे प्रत्त्युत्तर भाजपा नेते ज्योतिरादित्य शिंदे यांनी काँग्रेस नेते राहुल गांधी यांना दिलं आहे. ज्योतिरादित्य शिंदे काँग्रेसमध्ये असते तर मुख्यमंत्री झाले असते. आता भाजपमध्ये जाऊन बॅकबेंचर बनल्याची टीका काँग्रेसचे नेते राहुल गांधी यांनी सोमवारी केली होती. शिंदे यांनी राहुल गांधी यांना आपल्या शैलीत उत्तर दिलं आहे.  ज्योतिरादित्य शिंदे यांनी गेल्या वर्षी मार्च महिन्यात काँग्रेसला सोडचिठ्ठी देत भाजपमध्ये प्रवेश केला होता. 

शिंदे काय म्हणाले?
राहुल गांधी यांनी केलेल्या वक्तव्याबाबत बोलणे योग्य समजत नाही. जीवनामध्ये प्रत्येक गोष्टीचा एक स्तर असतो. गेल्या एक वर्षात मी खूप वर आलो आहे. राहुल गांधी आता माझी जेवढी चिंता करत आहेत. तेवढी चिंता मी काँग्रेसमध्ये असताना केली असती तर ते अधिक उचित ठरले असते.

राहुल गांधी काय म्हणाले होते?

सोमवारी युथ काँग्रेसच्या एका बैठकीत बोलताना राहुल गांधी म्हणाले, "ते (शिंदे) जर काँग्रेससोबत राहिले असते तर मुख्यमंत्री होऊ शकले असते, मात्र भाजपात ते बॅकबेंचर बनून राहिले आहेत. शिंदे यांच्याकडे काँग्रेससोबत काम करताना पक्षाला मजबूत करण्याचा पर्याय होता. मी त्यांना म्हटलं होतं की एक दिवस तुम्ही मुख्यमंत्री बनाल मात्र त्यांनी दुसरा मार्ग निवडला. मी तुम्हाला लिहून देतो की भाजपामध्ये ज्योतिरादित्य शिंदे कधीही मुख्यमंत्री होणार नाहीत. त्यासाठी त्यांना पुन्हा इकडेच यावं लागेल.

हे वाचा - उत्तराखंडमध्ये राजकीय भूकंप होणार; CM त्रिवेंद्र सिंह यांच्या राजीनाम्यानंतर कोण? हालचालींना वेग

ज्योतिरादित्यांची बाजू घेत मध्य प्रदेशचे गृहमंत्री नरोत्तम मिश्रा यांनी राहुल गांधींवर हल्लाबोल केला आहे. जे लोक दोन वर्षात काँग्रेसचा राष्ट्रीय अध्यक्ष निवडू शकले नाहीत ते कोणाला मुख्यमंत्री काय बनवणार? असं असेल तर काँग्रेसनं राजस्थानात सचिन पायलट यांना मुख्यमंत्री करावं.