Rahul Gandhi Marathi News : दिल्लीतल्या एका वरिष्ठ पोलिस अधिकाऱ्याच्या माहितीनुसार राहुल गांधींना बॉम्बने उडवण्याची धमकी देण्यात आलेली आहे. याबाबचे इनपुट पोलिसांना मिळाले आहेत. त्यानंतर राहुल यांच्या सुरक्षेमध्ये मोठी वाढ करण्यात आलीय.

महाराष्ट्रातल्या नाशिक पोलिसांना याबाबत इनपुट मिळाले आहेत. राहुल गांधींना त्यांचे वडील राजीव गांधींप्रमाणे बॉम्बने उडवण्याची धमकी देण्यात आलीय. भारत जोडो न्याय यात्रेदरम्यान त्यांच्यावर बॉम्बहल्ला होईल, अशी माहिती पोलिसांना देण्यात आली.

धमकीच्या इनपुटनंतर केंद्रीय गृह मंत्रालयाने राहुल गांधींच्या निवासस्थानी सुरक्षा वाढवली आहे. सोबतच दिल्ली पोलिस, युपी आणि मध्य प्रदेश पोलिसांना राहुल गांधींच्या सुरक्षेत वाढ करण्याच्या सूचना देण्यात आलेल्या आहेत. सध्या राहुल गांधींना झेड प्लस सुरक्षा देण्यात आलेली असून २ मार्च रोजी त्यांची यात्रा मध्य प्रदेशात प्रवेश करत आहे.

'अमर उजाला'ने दिलेल्या वृत्तानुसार दिल्ली पोलिसातील एका वरिष्ठ अधिकाऱ्याने सांगितलं की, गृह मंत्रालयाच्या आदेशानंतर २४ अकबर रोड येथील राहुल गांधींच्या निवासस्थानी सुरक्षेत वाढ करण्यात आलेली आहे. त्यांच्या घराच्या परिसरात पोलिस गस्त वाढवण्यात आलेली असून साध्या वेशातील पोलिस तैनात करण्यात आलेले आहेत.

राहुल गांधी यांना सध्या झेड प्लस सुरक्षा देण्यात आलेली आहे. त्यामध्ये संबंधित व्यक्तीसाठी १० पेक्षा जास्त एनएसजी कमांडे आणि पोलिस कर्मचाऱ्यांसह ५५ जवान तैनात असतात. सुरक्षा व्यवस्थेमधले कमांडो २४ तास डोळ्यात तेल घालून सुरक्षा पुरवत असतात. प्रत्येक कमांडो मार्शल आर्टचा स्पेशालिस्ट असतो.

दरम्यान, राहुल गांधींना धमकी देणारा नाशिक येथील एक मनोरुग्ण असल्याचं समोर येत आहे. याबाबत अद्याप अधिक माहिती मिळू शकलेली नाही.