नवी दिल्ली : काँग्रेस खासदार राहुल गांधी यांच्या हस्ते पुढील आठवड्यात अमर जवान ज्योतीचं भूमिपूजन केलं जाणार आहे. ३ फेब्रुवारी रोजी छत्तीसगडमध्ये हा कार्यक्रम पार पडणार आहे. छत्तीसगडचे मुख्यमंत्री भूपेश बघेल यांनी शनिवारी याची घोषणा केली. (Rahul Gandhi to lay foundation stone of Amar Jawan Jyoti next week)

बघेल यांनी म्हटलं की, "आपल्या शहिदांची वीरकथा आपल्या अनेक पिढ्यांसाठी प्रेरणा देणाऱ्या आहेत. देशासाठी कुठलंही योगदान नसलेल्यांना हे सर्व कळणार नाही. त्यामुळंच राहुल गांधी यांच्याहस्ते ३ फेब्रुवारी रोजी "अमर जवान ज्योती'चं भूमिपूजन केलं जाणार आहे. भारतमातेच्या सुपुत्रांना हीच खरी श्रद्धांजली असेल. जय हिंद"

दिल्लीतील इंडिया गेट येथील 'अमर जवान ज्योती'चं राष्ट्रीय युद्ध स्मारकामध्ये विलिनिकरण करण्यात आलं. यावरुन काँग्रेससह विरोधी पक्षांनी विविध केंद्रावर जोरदार टीका केली होती. काँग्रेसनं भाजपवर टीका करताना म्हटलं होतं की, सरकारकडून इतिहास पुसण्याचं काम सुरु आहे. काही लोकांना देशभक्ती आणि बलिदानाचं महत्व कळूच शकत नाही. तसेच अमर जवान ज्योती पुन्हा प्रज्वलित करण्यात येईल असंही राहुल गांधी यांनी म्हटलं होतं.