नवी दिल्ली : आंतरराष्ट्रीय योग दिनाची खिल्ली उडवताना कॉंग्रेसचे अध्यक्ष राहुल गांधी यांनी आज (शुक्रवार) ट्‌विट केलेल्या 'न्यू इंडिया' या उपहासात्मक फोटो ओळीमुळे ते सलग दुसऱ्या दिवशी भाजपच्या चौफेर हल्ल्यात सापडले आहेत.

भाजपाध्यक्ष व केंद्रीय गृहमंत्री अमित शहा आणि संरक्षणमंत्री राजनाथसिंह यांच्यासह भाजप नेत्यांनी राहुल गांधी यांच्या एकूणच मानसिकतेवर जोरदार टीकास्त्र सोडले आहे. 'न्यू इंडिया' ही पंतप्रधान नरेंद्र मोदींची ताजी घोषणा असली, तरी 'प्रधानसेवक', 'प्रथमसेवक' या संकल्पनेप्रमाणेच नवभारताच्या कल्पनेचेही मूळ पंडित नेहरू यांच्याच एका ऐतिहासिक भाषणात आहे.

संसदेत काल राष्ट्रपतींच्या अभिभाषणावेळी मोबाईलवर दंग असल्याचे दिसल्यावर राहुल गांधींवर भाजपने चौफेर हल्ला चढविला होता. त्यापाठोपाठ आज राहुल यांच्या ट्‌विटर अकाउंटवरून लष्कराचे जवान आणि त्यांच्या श्वान पथकाचा योग करतानाचा एक फोटो ट्‌विट केला गेला व त्याला "न्यू इंडिया' असे शीर्षक दिले. लोकसभा निवडणुकीत झालेल्या दारुण पराभवामधून कॉंग्रेस अद्याप सावरलेला नाही, त्यात आता राहुल गांधींच्या ताज्या कृतींमुळे भाजपच्या हाती ते नवनवीन कोलीत देत आहेत.

शहा यांनी ताज्या प्रसंगाबाबत म्हटले आहे, की कॉंग्रेस संपूर्ण नकारात्मकतेच्या भूमिकेत उभा आहे. त्यांनी आज तोंडी तलाकच्या मध्ययुगीन प्रथेचे जाहीर समर्थन केले व आता योग दिनाची चेष्टा करताना लष्कराला अपमानित केले. हा पक्ष सकारात्मकतेच्या मार्गावर पुढे जाईल व कठोर आव्हानांवर विजय मिळवून समोर येईल ही आशा आहे. राजनाथसिंह यांनीही राहुल गांधी यांच्यावर पलटवार करताना म्हटले आहे, की देशाच्या सुरक्षेत योगदान देणाऱ्या सैन्याचा कोणी वारंवार अपमान करतो, तेव्हा "परमेश्‍वरा, यांना सुबुद्धी दे' इतकीच प्रार्थना केली जाऊ शकते. 

त्यांनी पराभवातून अजूनही धडा घेतलेला नाही. त्यांनी एका फटक्‍यात भारतीय लष्कर, शूर जवान, श्वान पथक, योग परंपरा आणि देशाचा अपमान केला आहे. 
- तेजस्वी सूर्या, भाजप खासदार