पूर्व राजस्थान कालवा प्रकल्पाला (इआरसीपी) राष्ट्रीय प्रकल्प म्हणून दर्जा देण्यात यावा, या मागणीवर काँग्रेसकडून जोर देण्यात येणार आहे. या माध्यमातून काँग्रेस या विभागातील विधानसभांच्या ८३ जागांवर पक्षाच्या पकड मजबूत करण्याचा प्रयत्न करणार आहे.

राजस्थानमध्ये २३ नोव्हेंबर रोजी विधानसभेसाठी मतदान होणार आहे. पूर्व राजस्थानात १३ जिल्हे आणि ८३ मतदार संघांचा समावेश होतो. २०१८ मध्ये झालेल्या विधानसभेच्या निवडणुकीमध्ये काँग्रेसने या विभागातून ८३ पैकी ४९ जागांवर विजय मिळवला होता,

तर भाजपला केवळ २५ जागांवर समाधान मानावे लागले होते. त्यामुळे या निवडणुकीतही या जिल्ह्यांतील मतदारसंघांत विजय मिळवण्यासाठी काँग्रेसने राष्ट्रीय प्रकल्पाचा दर्जा मिळावा अशी मागणी लावून धरण्याची योजना आखली आहे. काँग्रेसने पूर्व राजस्थानातील बरान या जिल्ह्यातून निवडणुकीच्या प्रचाराला सुरुवात करण्याची योजना आखली आहे. या जिल्ह्याला 'इआरसीपी' चा लाभ होणार आहे. केंद्र सरकारने 'इआरसीपी' योजनेबाबत राजस्थानातील जनतेचा विश्वासघात केला आहे, या विरोधात आम्ही यात्रा काढणार आहोत' अशी माहिती राजस्थानचे मुख्यमंत्री अशोक गेहलोत यांनी नुकतीच माध्यमांना दिली आहे.