नवी दिल्लीः संसदेच्या अर्थसंकल्पीय अधिवेशनाचा आज सातवा दिवस आहे. राष्ट्रपतींच्या अभिभाषणावरील अभिनंदन प्रस्ताव चर्चेला आज पंतप्रधान नरेंद्र मोदी यांनी उत्तर दिलं. त्यांच्या भाषणातील मुद्द्यांचीच आज सर्वत्र चर्चा आहे. मात्र केंद्रीय मंत्री रामदास आठवले यांच्या शेरोशायरीने सभागृहात हशा पिकला होता.

राहुल गांधी यांनी काल सभागृहामध्ये अदानी प्रकरणावरुन मोदींवर निशाणा साधला होता. आज पंतप्रधानांनी शेरोशायरीतून त्यांनी उत्तर दिलं. मोदी म्हणाले की, मी काल पाहत होतो की काही लोकांच्या भाषणानंतर त्यांचे समर्थक उड्या मारत होते. कौतुक करत होते.

काही जण ये हुई ना बात असंही म्हणत होते. कदाचित त्यांना झोपही चांगली लागली असेल. कदाचित आज उठताही आले नसेल. अशा लोकांसाठी एक गोष्ट खुप चांगली. ती म्हणजे, 'ये कह कहकर हम दिल को बहला रहे हैं, वो अब चल चुके हैं, वो अब आ रहे हैं। ' अशी शेरोशायरी करत मोदींनी राहुल गांधी यांना अप्रत्यक्षपणे खोचक टोमणे मारले.

मात्र खरा हशा पिकला तो केंद्रीय मंत्री रामदास आठवले यांच्या शेरोशायरीने. काँग्रेसवर बोलतांना आठवले म्हणाले की, 'राष्ट्रपती जी का भाषण मजबूत करेगा भारत नेशन, विरोध करना है कांग्रेस का फैशन.. इसलिए मैं उनके विरोध में कर रहा हूं भाषण'

'काँग्रेसवाल्यांनी जेवढी दाढी वाढवायची तेवढी वाढवावी'

'काँग्रेसवालो जितनी बढानी है बढाओ दाढी, लेकिन मोदी जी की बहुत मजबूत है बॉडी' काँग्रेसच्या लोकांनी कितीही दाढी वाढवली तरी मोदींची बॉडी मजबूत असल्याचं सांगून आठवले यांनी राहुल गांधींवर निशाणा साधला आहे.

आठवले पुढे म्हणाले की, मोदी जी को मालू है देश के तमाम लोगों की नाडी, तो काँग्रेस की कैसे चलेगी उनके सामना गाडी.. मोदी जी आदमी है खास, इसलिए उनके साथ है रामदास.. मोदी जी को विकास की है आस इसलिए राजनीति में वे हो गऐ हैं पास..असं म्हणून त्यांनी शायरी पूर्ण केली.