रिलायन्स इंडस्ट्रीजचे चेअरमन मुकेश अंबानी सिंगापूरमध्ये फॅमिली ऑफिस उघडण्याचा विचार करत आहेत. जगातल्या इतरही काही श्रीमंत लोकांनी सिंगापूरमध्ये आपली फॅमिली ऑफिसेस सुरू केली आहेत. आपले आर्थिक व्यवहार सांभाळण्यासाठी या लोकांना फॅमिली ऑफिसेसची गरज पडते.

मुकेश अंबानी यांनी फॅमिली ऑफिससाठी कर्मचारी नियुक्त करण्यासाठी मॅनेजरची निवड केली आहे. त्यांनी जागाही बघून ठेवली आहे. सिंगापूरमध्ये फॅमिली ऑफिस सुरू करण्याचा अंबानींचा निर्णय हा त्यांचा व्यवसाय जागतिक स्तरावर नेण्याच्या प्रयत्नांचा एक भाग आहे. अलीकडे, सिंगापूर हे कमी कर आणि सुरक्षेमुळे श्रीमंतांसाठी फॅमिली ऑफिसेस सुरू करण्यासाठी एक पसंतीचे ठिकाण म्हणून उदयास आले आहे. या यादीत अब्जाधीश रे डॅलिओ आणि गुगलचे सह-संस्थापक सेर्गे ब्रिन यांचाही समावेश आहे.

शिवाय, मुकेश अंबानी यांच्या पत्नी नीता अंबानी देखील सिंगापूरमध्ये फॅमिली ऑफिस सुरू करण्यासाठी मदत करत आहेत. या प्रकरणावर अंबानींनी अधिकृतपणे कोणतीही माहिती दिेलेली नाही. सप्टेंबरमध्ये, अब्जाधीश गौतम अदानी यांनी मुकेश अंबानींना मागे टाकले आणि आयआयएफएल वेल्थच्या भागीदारीत श्रीमंत भारतीयांच्या यादीत अव्वल स्थान मिळवले.