नवी दिल्ली : कच्च्या तेलाच्या (Crude Oil ) किमतीत वाढ होत असताना पेट्रोल आणि डिझेलचे दर वाढले नसले तरी, महागाई मात्र वाढत असून, सरकारने जाहीर केलेल्या ताज्या आकडेवारीनुसार किरकोळ महागाई आठ महिन्यांच्या उच्चांकावर पोहोचली आहे. जानेवारीमध्ये हा दर 6.01 टक्के होता, त्यात वाढ नोंदवण्यात आली असून, किरकोळ महागाई दर 6.07 टक्के झाला आहे. (Retail Inflation Rises In February)

सरकारी आकडेवारीनुसार फेब्रुवारी महिन्यात घाऊक महागाईतही वाढ झाली आहे. घाऊक महागाई फेब्रुवारीमध्ये 13.11 टक्के होती, तर जानेवारी 2022 मध्ये 12.96 टक्के होती. किरकोळ महागाईचा हा दर रिझव्‍‌र्ह बँकेने चलनवाढ नियंत्रित करण्यासाठी निर्धारित केलेल्या मर्यादेपेक्षा जास्त असून, वाढत्या महागाईचा हा ट्रेंड असाच सुरू राहिला तर रिझर्व्ह बँकेला व्याजदर वाढवण्याच्या दिशेने वाटचाल करावी लागू शकते.

विशेष म्हणजे, युक्रेनच्या संकटाच्या काळात जगभरात तेल, वायू आणि धातूंच्या किमती झपाट्याने वाढल्या आहेत. त्यामुळे भारतातही महागाई वाढण्याची शक्यता वर्तवण्यात येत आहे. अमेरिकेत चलनवाढीचा दर जवळपास 40 वर्षांच्या उच्चांकावर पोहोचला असून, फेडरल रिझर्व्हने व्याजदरात वाढ करण्याचे स्पष्ट संकेत दिले आहेत, जेणेकरून महागाईवर नियंत्रण ठेवता येईल. कच्च्या तेलाच्या बाजारभावानुसार पेट्रोल आणि डिझेलचे दरही वाढले तर महागाई आणखी वाढण्याची शक्यता असल्याचे भारतातील आर्थिक तज्ज्ञांचे म्हणणे आहे. त्यामुळे खाद्यपदार्थ, फळे आणि भाज्यांच्या किमतीही वाढू शकतात.