नवी दिल्ली - भारतात कोरोनाच्या दुसऱ्या लाटेनं थैमान घातलं आहे. देशात कोरोना प्रतिबंधक लशीच्या (Corona Vaccine) लसीकरण मोहिमेला सुरुवात झाली असली तरी लशींच्या तुटवड़्यामुळे त्याचाही वेग कमी आहे. सध्या भारतात (India) दोन लशी दिल्या जात असून रशियाची स्पुटनिक व्ही (Sputnik V) लसही आता दाखल झाली आहे. दरम्यान, दुसरीकडे डीआरडीओने तयार केलेलं अँटिकोविड औषधही लाँच झालं आहे. यातच आता सिप्लाने (Cipla) मोठी घोषणा केली आहे. आघाडीची औषध कंपनी रोशे इंडिया (Roche India) आणि सिप्ला यांनी सोमवारी भारतात रोशेची अँटिबॉडी कॉकटेल (Antibody Cocktail) लाँच करण्याची घोषणा केली. या औषधाचा वापर गंभीर रुग्णांसाठी करण्यात येणार आहे. (Roche antibody cocktail available in india covid treatment drug)

सिप्ला आणि रोशे यांनी सांगितलं की, अँटिबॉडी कॉकटेलची पहिला खेप भारतात दाखल झाली आहे. तर दुसरी खेप जूनच्या दुसऱ्या आठवड्यापर्यंत पोहोचेल. यामुळे जवळपास दोन लाख रुग्णांवर उपचार करता येणार आहेत. सिप्ला देशभरात हे अँटिबॉडी कॉकटेल देशभरात वितरीत करणार आहे. अँटिबॉडी कॉकटेलच्या एका रुग्णासाठीच्या डोसची किंमत 59 हजार 750 रुपये इतकी आहे. सर्व करांसहीत ही किंमत असून अँटिबॉडी कॉकटेल प्रमुख रुग्णालये आणि कोरोना ट्रिटमेंट सेंटर्समधून औषध उपलब्ध होईल.

अँटिबॉडी कॉकटेलच्या औषधाचा एक डोस हा 1200mg इतका आहे. यामध्ये Casirivimab आणि Imdevimab अशी दोन औषधे असणार आहेत. तसंच एका डोसची किंमत 59 हजार 750 रुपये इतकी आहे. याशिवाय मल्टि डोस पॅकची किंमत 1 लाख 19 हजार 500 रुपये आहे. मल्टिडोस पॅकमध्ये दोन रुग्णांना डोस देता येतील. अँटिबॉडी डोस हा 12 वर्षांवरील सर्वांसाठी आहे. यामध्ये संबंधित रुग्णाचे वजन किमान 40 किलो असायला हवे. गंभीर असणाऱ्या रुग्णांना याचा डोस देता येईल.