हरिद्वार : राष्ट्रीय स्वयंसेवक संघाच्या (RSS) कार्यकर्त्यानं संघटनेला '21 व्या शतकातील कौरव' संबोधल्याबद्दल काँग्रेस नेते राहुल गांधी (Rahul Gandhi) यांच्याविरोधात हरिद्वार न्यायालयात (Haridwar Court) मानहानीचा खटला दाखल केलाय.

आरएसएस कार्यकर्ते कमल भदौरिया (Kamal Bhadauria) यांच्या वकिलानं सांगितलं की, 'राहुल गांधींविरोधात भारतीय दंड संहितेच्या (IPC) कलम 499 आणि 500 ​​अंतर्गत आरएसएसविरोधात अशोभनीय टिप्पणी केल्याबद्दल न्यायालयात खटला दाखल केला आहे.'

या वर्षी 9 जानेवारीला हरियाणातील भारत जोडो यात्रेदरम्यान (Bharat Jodo Yatra) राहुल गांधींनी '21 व्या शतकातील कौरव खाकी हाफ पँट घालतात आणि शाखा चालवतात' असं म्हटलं होतं. त्यांच्या पाठीशी देशातील दोन ते तीन श्रीमंत लोक उभे आहेत, असंही ते म्हणाले होते.

न्यायाधीश शिव सिंह यांनी फिर्यादीला सुनावणीसाठी 12 एप्रिल 2023 रोजी न्यायालयात हजर राहण्यास सांगितलंय. भदौरियांच्या वकिलानं सांगितलं की, 'राहुल गांधींनी आरएसएसची तुलना 21 व्या शतकातील कौरवांशी केली. हे त्यांचं अशोभनीय बोलणं त्यांची मानसिकता स्पष्ट करते. आरएसएस ही अशी संघटना आहे, जी देशातील कोणत्याही आपत्तीच्या वेळी मदतीसाठी पुढं येते.'

कमल भदौरिया यांच्या तक्रारीत पुढं म्हटलंय, 'राहुल गांधी म्हणाले की हा देश संन्याशांचा आहे, पुरोहितांचा नाही. असं सांगून त्यांनी संन्याशांची तपस्वी आणि पुरोहितांमध्ये विभागणी केली. त्यामुळं देशातील जनतेच्या भावना दुखावल्या गेल्या आहेत. या तक्रार याचिकेत राहुल गांधींवर खटला चालवण्याची मागणी करण्यात आली आहे.

विशेष म्हणजे, राहुल गांधींना नुकतंच 'मोदी आडनाव' प्रकरणी सुरत न्यायालयानं एका मानहानीच्या खटल्यात दोषी ठरवलंय. त्यानंतर त्यांना लोकसभेतून खासदार म्हणून अपात्र ठरवण्यात आलं. याशिवाय, बिहारच्या पाटणा जिल्ह्यातील न्यायालयानं राहुल गांधींना त्यांच्याविरुद्ध दाखल केलेल्या मानहानीच्या खटल्यात सीआरपीसीच्या कलम 313 अंतर्गत त्यांचं म्हणणं नोंदवण्यासाठी 12 एप्रिलला हजर राहण्याचे निर्देश दिले आहेत.