नागपूर येथे राष्ट्रीय स्वयंसेवक संघाच्या नागपूर येथील मुख्यालयात विजयादशमीचा उत्सव साजरा करण्यात आला. यावेळी नागपुरातील रेशीम बाग मैदानावर दसरा मेळाव्याचे आयोजन करण्यात आले. या कार्यक्रमात संघाचे सरसंघचालक मोहन भागवत यांनी उपस्थित आरएसएस कार्यकर्त्यांना मार्गदर्शन केले. यावेळी भागवत यांनी आगामी निवडणूकीत मतदान करण्याबाबत तसेच मणिपूर हिंसाचाराच्या मुद्द्यावर देखील भाष्य केलं.

यावेळी बोलताना मोहन भागवत यांनी आगामी निवडणूकीच्या पार्श्वभूमिवर सर्वांनी मतदान करावं असं आवाहन केलं.भागवत म्हणाले की, लक्षात ठेवा निवडणूकीत मतदान करणे सर्वांचे कर्तव्य आहे. सर्वांनी मतदान केलं पाहिजे हे आपलं राष्ट्रीय कर्तव्य आहे. लोकांनी मतदान करावं यासाठी आरएसएसचे कार्यकर्ते काम करतील. पण आपण मतदान लहान-लहान गोष्टी पाहूण करू नये. मतदान भडकावू भाषणं ऐकून करायचं नाही, तर कोण चांगलं काम केलं याचा थंड डोक्याने विचार करा. आता भारतातील जनतेकडे सर्वांचा अनुभव आहे. त्यामध्ये सर्वात चांगलं कोण उपलब्ध आहे हे पाहूण त्याला मत द्या, असे अवाहन मोहन भागवत यांनी केलं.

मतदानाच्या प्रचारादरम्यान अनेक डावपेच वापरले जातील, आपण त्या आगीत पडणार नाहीत या पद्धतीने काम करा असेही मोहन भागवत म्हणाले.

मणिपूर हिंसाचारामागे कोण?

य़ावेळी मोहन भागवत यांनी मणिपूर हिंसाचारावर देखील भाष्य केलं. भागवत म्हणाले की, मणिपूरमधील परिस्थिती सध्या पुर्वपदावर येत आहे, पण आपापसात हे भांडण कसं झालं. अनेक वर्षांपासून मणिपूरी मैतेइ आणि कुकी एकत्र राहत आले आहेत. अचानक हिंसाचार कसा झाला. ते भारताच्या सीमेवरील क्षेत्र आहे तेथे असा प्रकार होणं यामध्ये कोणाचा फायदा आहे? यामागे कोण होतं असे प्रश्नही भागवत यांनी उपस्थित केला.